Հա

Համայնք

08/04/2017 - 11:10

Սեպուհ արք. Սարգսեան. «Մարդկային կեանքում ամենանւիրական գործը հայրենիքի սիրոյն  զոհագործութիւնն է»

Ապրիլի 7-ին Թեհրանի հայոց թեմի բոլոր եկեղեցիները բազմամարդ էին, քանզի ժողովուրդը եկել էր իր յարգանքի տուրքը մատուցելու 2016-ի ապրիլի քառօրեայ պատերազմում նահատակւած հայ զինւորների հոգիներին:

«alikonline.ir» - Ապրիլի 7-ին Թեհրանի հայոց թեմի բոլոր եկեղեցիները բազմամարդ էին, քանզի ժողովուրդը եկել էր իր յարգանքի տուրքը մատուցելու 2016-ի ապրիլի քառօրեայ պատերազմում նահատակւած հայ զինւորների հոգիներին: Այս մասին տեղեկացնում է «ԱԼԻՔ»-ի թղթակից Կարինէ Դաւթեանը:

Օրւայ եկեղեցական արարողութիւնը նշանաւորւեց նաեւ Ս. Մարիամ Աստւածածնին մայրութեան աւետման տօնի հետ, որը համընկնում է նաեւ հայ մայրերի տօնին: Այդ առիթով, երէկ առաւօտեան նախ մատուցւեց ս. պատարագ, որի ընթացքում Թեհրանի տարբեր եկեղեցիներում քահանայ հայրերը անդրադարձան օրւայ խորհրդին, որից յետոյ կատարւեց հոգեհանգստեան արարողութիւն՝ նահատակւած հայ զինւորների յիշատակին:

Թեհրանի Ս. Սարգիս առաջնորդանիստ եկեղեցում նախագահութեամբ Թեհրանի հայոց թեմի առաջնորդ Տ. Սեպուհ արք. Սարգսեանի ընթացաւ ս. պատարագ, որի ընթացքում թեմակալ առաջնորդն իր քարոզի մէջ համապարփակ ձեւով անդրադարձաւ Մարիամ Աստւածածնին մայրութեան աւետման հանգամանքին: Սրբազան Հայրը շեշտեց, որ տօնը քրիստոնէական եկեղեցու մեծագոյն եւ ժողովրդական նկարագիր ունեցող տօներից մէկն է, որ Կաթոլիկ եկեղեցին այն նշում է մարտին, քանի որ Յիսուսի ծնունդը նշում է դեկտեմբերին եւ աւելացրեց, որ Աստւած այքան սիրեց աշխարհը, որ իր միածին որդուն աշխարհ ուղարկեց մարդու փրկութեան համար եւ երկնքի ու երկրի կապը սիրոյ այդ զգացումն է եւ աւելացրեց. «Փառք եմ տալիս որ երջանկայիշատակ Արտակ Սրբազանն այս օրը Իրանի թեմում հռչակել է, որպէս մայրերի օր, որովհետեւ Աստւածամօր Աստւածացումը եւ մայրութեան խորհուրդն անքակտելիօրէն կապւած են իրարու»:

Քարոզի ընթացքում թեմակալ առաջնորդն ընդգծեց. «Այսօրւայ տօնը որպէս մայրութեան տօն, խաղաղութեան եւ սիրոյ տօնն է եւ այսօր մեզի համար, յատկապէս այս օրերին աւելի է նւիրականանում այն, երբ մենք անցնող տարւայ ընթացքին մեր հայ մայրերի ծոցից ծնած մեր քաջարի զինւորների հերոսական գործողութիւններով մեր հայրենիքը, մեր որդիների արեամբ մէկ անգամ եւս նւիրացրեցինք ու սրբացրինք: Մարդկային կեանքում ամենանւիրական գործը հայրենիքի սիրոյն զոհագործութիւնն է»:

Վերջում Սրբազան Հայրը շնորհաւորեց բոլոր հայ մայրերին տօնի առիթով:

Յաւարտ ս. պատարագի կատարւեց հոգեհանգստեան արարողութիւն, իսկ արարողութեան ընթացքում եկեղեցում Հ.Մ.Ա.Կ.-ի Սկաուտական միութեան սկաուտները պատւի էին կանգնել նահատակ զինւորների յիշատակին:

Նշենք, որ արարողութեանը ներկայ էին Իրանում Հայաստանի Հանրապետութեան դեսպանութեան դիւանագիտական անձնակազմը, Իսլամական խորհրդարանում Թեհրանի եւ հիւսիսային իրանահայութեան պատգամաւոր դոկտ. Կարէն Խանլարեանը, «ԱԼԻՔ» հաստատութեան ներկայացուցիչը, Թ.Հ.Թ. Թեմական խորհրդի եւ ազգային մարմինների ներկայացուցիչներն ու մեծ թւով ժողովուրդ:

 

 

Յարակից լուրեր

  • Ողջոյն քառասնամեայ յեղափոխութեան
    Ողջոյն քառասնամեայ յեղափոխութեան

    Մարդկային կեանքը յատկանշող եւ միաժամանակ բնորոշող երեւոյթներից մին շարժումն է, յարատեւ շարժը, որ յառաջ է բերում կեանքի փոփոխութիւն, նոր մտածելակերպի ձեւաւորում եւ կեանքի նոր ապրելակերպ ու գործելաոճ. ընկերային թէ քաղաքական, մշակութային թէ հոգեւոր ասպարէզներում յաջողութիւն, ժողովուրդները նոր հեռանկարով ու յոյսով պարուրող շարժումը դառնում է իրական ու իրաւական կեանք ունեցող երեւոյթ երբ իր մեկնակէտն ու վախճանակէտը ժողովուրդն է, հարազատ ժողովուրդը իր անցեալով, ներկայով ու ապագայով։ 

  • Առաջնորդ Սրբազանը մասնակցում է Միջին Արեւելքի եկեղեցիների խորհրդի Գործադիր վարչութեան ժողովին, 21-24 յունւար 2019 Աթշանէ ասորիների պատրիարքարանում
    Առաջնորդ Սրբազանը մասնակցում է Միջին Արեւելքի եկեղեցիների խորհրդի Գործադիր վարչութեան ժողովին, 21-24 յունւար 2019 Աթշանէ ասորիների պատրիարքարանում

    Ինչպէս նախօրօք յայտնած էինք թեմիս առաջնորդ գերշ. Տ. Սեպուհ Ս. արք. Սարգսեան յունւարի 21-24 2019-ին Լիբանանում մասնակցեց Միջին Արեւելքի եկեղեցիների խորհրդի Գործադիր վարչութեան տարեկան ժողովին, որը գումարւեց Ասորի Ուղղափառ եկեղեցու պատրիարքարանում Աթշանէ հիւրընկալութեամբ Ասորի եկեղեցու հոգեւոր պետ նորին սրբութիւն Մար Աֆրամ Բ. Պատրիարքի։

  • Իրանում ՀՀ դեսպանութեան նախաձեռնութեամբ նշւեց ՀՀ Բանակի 27-ամեակը
    Իրանում ՀՀ դեսպանութեան նախաձեռնութեամբ նշւեց ՀՀ Բանակի 27-ամեակը

    Հայաստանի Հանրապետութեան Բանակի օրը՝ յունւարի 28-ը նշւում է ոչ միայն Հայաստանում, այլեւ իւրաքանչիւր երկրում, ուր ՀՀ-ն ունի դեսպանատուն եւ պաշտօնական ներկայացուցչութիւն:

    Իրանում ՀՀ դեսպանութեան նախաձեռնութեամբ, երէկ յունւարի 28-ի երեկոյեան «Արարատ» մարզաւանի «Վաչիկ Ղարաբէգեան» սրահում կազմակերպւել էր իւրայատուկ միջոցառում նւիրւած ՀՀ Բանակի կազմաւորման 27-ամեակին:

  • Մշակոյթի նախարարութեան մշակութային հարցերի տեղակալի այցն ազգային առաջնորդարան
    Մշակոյթի նախարարութեան մշակութային հարցերի տեղակալի այցն ազգային առաջնորդարան

    Կիրակի, յունւարի 27-ին, Նոր տարւայ եւ Ս. Ծննդեան տօների առիթով Իրանի Իսլամական լուսաւորութեան եւ մշակոյթի նախարարութեան մշակութային հարցերի տեղակալը՝ պրն. Մոհսէն Ջաւադին եւ նրա գլխաւորած պատւիրակութիւնը, այցելեցին Ազգային առաջնորդարան, ուր հանդիպեցին Թեհրանի հայոց թեմի առաջնորդ գերշ. Տ. Սեպուհ Ս. արք. Սարգսեանի հետ:

  • Այցելութիւն ազգային առաջնորդարան
    Այցելութիւն ազգային առաջնորդարան

    Կիրակի 27 յունւարին, գաղութիս ազգային գործիչ եւ գործարար՝ պրն. Յովսէփ Ղուկասեանը, Էսթոնիայի Հանրապետութեան պատւոյ հիւպատոս՝ պրն. Արմէն Մութաֆեանը եւ իր եղբայր՝ պրն. Ալբերտ Մութաֆեանը քաղաքավարական այցելութիւն տւին թեմիս առաջնորդ՝ գերշ. Տ. Սեպուհ Ս. արք. Սարգսեանին:

Ամենաշատ ընթերցւած

Քւէարկութիւն

Կը յաջողւի՞ արդեօք Արմէն Սարգսեանին նոր որակ մտցնել ՀՀ քաղաքական կեանքում:

Եղանակ

Հեղինակություն © 2011-2017 «ԱԼԻՔ» Օրաթերթ։ Բոլոր իրավունքները պահպանված են։