Հա

Մշակոյթ

12/09/2018 - 10:50

«Արամ Մանուկեան. նամականի» գրքի շնորհանդէսը Շուշիում

Սեպտեմբերի 11-ին Շուշիում՝ Արցախի Հանրապետութեան մշակոյթի, երիտասարդութեան հարցերի եւ զբօսաշրջութեան նախարարութեան շէնքում կայացել է Երւանդ Փամբուկեանի «Արամ Մանուկեան. նամականի» գրքի շնորհանդէսը: Այն Արամ Մանուկեանի տասնամեայ (1904-1915) նամակագրութիւնն է` ամբողջական բովանդակութեամբ ու ժամանակագրական հերթականութեամբ:

«alikonline.ir» - Սեպտեմբերի 11-ին Շուշիում՝ Արցախի Հանրապետութեան մշակոյթի, երիտասարդութեան հարցերի եւ զբօսաշրջութեան նախարարութեան շէնքում կայացել է Երւանդ Փամբուկեանի «Արամ Մանուկեան. նամականի» գրքի շնորհանդէսը: Այն Արամ Մանուկեանի տասնամեայ (1904-1915) նամակագրութիւնն է` ամբողջական բովանդակութեամբ ու ժամանակագրական հերթականութեամբ: Տեղեկացնում է «Ապառաժ»-ը:

Հայոց պետականութեան հիմնադրի կեանքի ու գործունէութեան մի ժամանակշրջանը ներկայացնող գրքի շնորհանդէսին ներկայ էին ԱՀ ՄԵՀԶ նախարար Լեռնիկ Յովհաննիսեանը, ԱՀ ԱԺ փոխնախագահ Վահրամ Բալայեանը, ՀՅԴ Արցախի ԿԿ ներկայացուցիչ Դաւիթ Իշխանեանը, գրքի հեղինակ Երւանդ Փամբուկեանը, ընթերցասէրներ, լրագրողներ:

Բացելով միջոցառումը «Համազգային» հայ կրթական եւ մշակութային միութեան Արցախի գրասենեակի պատասխանատու Հերմինէ Աւագեանը նշել է, որ գրքում ներկայացւում է ոչ միայն այդ ժամանակաշրջանի հայկական իրականութիւնը, այլ նաեւ լոյս է սփռւում Արամ Մանուկեանի անձնաւորութեան վրայ: «Գրքում զետեղւած 354 նամակները մեծամասամբ անտիպ են, որոնցում վեր է հանւում Արամ Մանուկեանի կերպարը»,- իր խօսքում ասել է Հերմինէ Աւագեանը:

ԱՀ ՄԵՀԶ նախարար Լեռնիկ Յովհաննիսեանն նշել է, որ պատահական չէ գրքի շնորհանդէսի կազմակերպումը հէնց Արամ Մանուկեանի ծննդավայր Շուշիում, որն անկասկած մեծ ազդեցութիւն է ունեցել ապագայ քաղաքական ու յեղափոխական գործչի ձեւաւորման գործում: Նախարարը յատուկ շնորհակալութիւն յայտնեց ՀՅԴ պատմութեան անխոնջ ուսումնասիրող Երւանդ Փամբուկեանին՝ կատարած աշխատանքի համար:

Գրքի հեղինակը ներկաներին հետաքրքիր մասնամասներ ներկայացրեց Արամ Մանուկեանի կեանքի մասին, շեշտելով, որ նա անանձնական, համեստագոյն, նւիրեալ, համբերատար մարդ էր: Նա ահաւոր յօդացաւեր ունէր եւ չնայած դրան ակտիւօրէն մասնակցում էր յեղափոխական պայքարին, դարձել էր բոլոր վանեցիների սիրելին, չնայած վերջիններս այնքան էլ չէին սիրում եկւորներին:

ԱրՊՀ պրոֆեսոր Արարատ Վարդանեանը կարեւորել է նման նախաձեռնութիւնը եւ շեշտել, որ Արամ Մանուկեանն իր ամբողջ կեանքը նւիրել է հայ ժողովրդին, պայքարել ժողովրդի ազատութեան համար, հայոց անկախ պետականութեան վերականգնման համար եւ տպագրւած գրքով ընթերցողները նոր տեղեկութիւններ կարող են ստանալ ազգանւէր գործչի մասին:

Շնորհանդէսը կայացել է ԱՀ ՄԵՀԶ նախարարութեան եւ «Համազգային» հայ կրթական եւ մշակութային միութեան Արցախի գրասենեակի համագործակցութեամբ: Այն նւիրւած էր Հայաստանի Առաջին Հանրապետութեան 100-ամեակին:

Յարակից լուրեր

Ամենաշատ ընթերցւած

Քւէարկութիւն

Կը յաջողւի՞ արդեօք Արմէն Սարգսեանին նոր որակ մտցնել ՀՀ քաղաքական կեանքում:

Եղանակ

Հեղինակություն © 2011-2017 «ԱԼԻՔ» Օրաթերթ։ Բոլոր իրավունքները պահպանված են։