Հա
16/12/2017

Մեկնարկեց «Մեղրի» ազատ տնտեսական գօտու գործունէութիւնը

Դեկտեմբերի 15-ին ՀՀ վարչապետ Կարէն Կարապետեանի ներկայութեամբ, «Մեղրի» ազատ տնտեսական գօտին պաշտօնապէս մեկնարկել է իր գործունէութիւնը:

«alikonline.ir» - Դեկտեմբերի 15-ին ՀՀ վարչապետ Կարէն Կարապետեանի ներկայութեամբ, «Մեղրի» ազատ տնտեսական գօտին պաշտօնապէս մեկնարկել է իր գործունէութիւնը: Տեղեկացնում են հայաստանեան ԶԼՄ-ները:

«Մեղրի» ազատ տնտեսական գօտին ստեղծւել է ՀՀ կառավարութեան նախաձեռնութեամբ: Գօտու կազմակերպիչ է ճանաչւել պետութեան կողմից ստեղծւած «Մեղրի ազատ տնտեսական գօտի» ՓԲԸ-ն։ «Մեղրի» ազատ տնտեսական գօտու կառուցումը նախատեսւած է իրականացնել երկու փուլով:

Առաջին փուլով պէտք է ստեղծւէին նւազագոյն անհրաժեշտ ենթակառուցւածքներ եւ նախապայմաններ ազատ տնտեսական գօտին գործարկելու եւ ազատ տնտեսական գօտում գործունէութիւն ծաւալելու հետաքրքրութիւն ունեցող ընկերութիւնների հետ տեղում աշխատանքները կազմակերպելու համար, ինչն արդէն իսկ իրականացւել է:

Երկրորդ փուլով նախատեսւում է ազատ տնտեսական գօտու գործունէութեան, ենթակառուցւածքների ընդլայնում, տարածքի յաւելեալ աւելացում 70 հեկտարով՝ այսպիսով  ստեղծելով նախապայմաններ շահութաբեր բիզնես գործունէութիւն ծաւալելու համար: Վերոնշեալ  տարածքի շուրջ 50 հեկտարը կը յատկացւի շահագործողներին՝ իրենց գործունէութիւնը կազմակերպելու համար, 10 հեկտարը՝ լոգիստիկ-պահեստային տարածքների, մնացած տարածքները նախատեսւած են գրասենեակային եւ այլ ծառայութիւնների համար։

Ազատ տնտեսական գօտու գործունէութեան արդիւնքում առաջիկայ տարիներին նախատեսւում է ներգրաւել 50-70 շահագործող ընկերութիւններ, որոնք կիրականացնեն շուրջ 100-130 մլն. ԱՄՆ դոլարի ներդրումներ, կը ստեղծեն շուրջ 1500 նոր աշխատատեղեր եւ կարտահանեն շուրջ 250 մլն. ԱՄՆ դոլարի ապրանքներ եւ ծառայութիւններ։

Իրանի հետ սահմանակից տարածքում գործող ազատ տնտեսական գօտին, հաշւի առնելով աշխարհագրական դիրքը, առեւտրային եւ լոգիստիկ հնարաւորութիւնները, ինչպէս նաեւ Հայաստանի բազմավեկտոր առեւտրային արտօնեալ ռեժիմները, կամուրջ կը հանդիսանայ Իրանի, ԵԱՏՄ եւ ԵՄ երկրների միջեւ։ Բացի այդ, «Մեղրի» ազատ տնտեսական գօտին կը նպաստի ոչ միայն Սիւնիքի մարզի սոցիալ-տնտեսական խնդիրների լուծմանը, այլեւ Հայաստան արտասահմանեան կապիտալի ներհոսքին, Իրանի հետ տնտեսական կապերի ամրապնդմանը, ԵԱՏՄ անդամակցութեան, ԵՄ հետ առկայ յարաբերութիւնների եւ ներուժի առաւել արդիւնաւէտ օգտագործմանը:

Նշենք, որ «Մեղրի» ազատ տնտեսական գօտու գործունէութեան մեկնարկի պաշտօնական արարողութեանը ներկայ են եղել նաեւ ՀՀ-ու Իրանի արտակարգ եւ լիազօր դեսպան Սէյէդ Քազեմ Սաջջադին եւ Իրանում ՀՀ արտակարգ եւ լիազօր դեսպան Արտաշէս Թումանեանը:

Յարակից լուրեր

Ամենաշատ ընթերցւած

Քւէարկութիւն

Կը յաջողւի՞ արդեօք Արմէն Սարգսեանին նոր որակ մտցնել ՀՀ քաղաքական կեանքում:

Եղանակ

Հեղինակություն © 2011-2017 «ԱԼԻՔ» Օրաթերթ։ Բոլոր իրավունքները պահպանված են։