Հա

Ազգային

05/04/2017

ՀՅԴ Հայաստանի Գերագոյն մարմնի յայտարարութիւնը

Այս ընտրութիւններում Հ. Յ. Դաշնակցութեան արձանագրած նկատելի առաջընթացը պարտաւորեցնող է։ Մենք շարունակելու ենք հետեւողականօրէն իրագործել մեր գաղափարներն ու ծրագրերը՝ հաւատարիմ ՀՀ քաղաքացիներին տրւած՝ նոր սկիզբ դնելու, ազատ, արդար, խաղաղ, բարեկեցիկ Հայաստան ունենալու խոստմանը:

Ապրիլի 2-ին կայացած Ազգային ժողովի ընտրութիւնները խորհրդարանական եւ ընտրական համակարգերի առաջին փորձութիւնն էին՝ քաղաքական նոր մշակոյթ ձեւաւորելու, նոր սկիզբ դնելու առաջադրանքով։

Մեկնելով նախընտրական շրջանի, ընտրութեան օրւայ եւ արդիւնքների վերլուծութիւնից՝ Հ. Յ. Դաշնակցութեան Հայաստանի Գերագոյն մարմինը արձանագրում է.

ա. Քաղաքական համակարգի կայացման առումով գնահատելի էր դերակատար ուժերի ազատ մրցակցութիւնը եւ հիմնականում քաղաքակիրթ ընտրապայքարը։

բ. Յատուկ քննութեան կարիք ունի ընտրողների անսպասելի բարձր մասնակցութիւնը, ինչը մի կողմից քաղաքացիական ակտիւութեան գնահատելի դրսեւորում էր, միւս կողմից՝ ֆինանսական ու վարչական ռեսուրսի օգտագործման արատաւոր երեւոյթի հետեւանք։

գ. Փաստ է, որ սոցիալական դժւար կացութեան մէջ յայտնւած հասարակութեան զգալի մասը, որը չունի անհրաժեշտ քաղաքացիական ակտիւ դիրքորոշում, դեռեւս ի վիճակի չէ ազատ ու գիտակցւած ընտրութիւն կատարել։ Հանրութեան քաղաքական, հոգեւոր-մշակութային արժեհամակարգի արմատական փոփոխութիւնը կուսակցութիւնների, քաղաքացիական հասարակութեան, ազգային-պետական ընտրախաւի լրջագոյն մարտահրաւէրն է։

դ. Տեղի է ունեցել քաղաքական դաշտի որոշակի բիւրեղացում. բացայայտ ամբոխավարական եւ պարտւողական գաղափարները չընդունւեցին մեր հանրութեան կողմից։

ե. Գնահատելի է, որ իրենց մասնագիտական պարտականութիւնները եւ քաղաքացիական պարտքը կատարեցին լրատւամիջոցներն ու իրապէս անկախ դիտորդական կազմակերպութիւնները։

զ. Նոր Ազգային ժողովում Հ. Յ. Դաշնակցութեան դերակատարութեան ձեւաչափը թողնելով առաջիկայ օրերի քննարկումներին՝ մենք շնորհակալութիւն ենք յայտնում գիտակից քւէարկութիւն կատարած իւրաքանչիւր քաղաքացու, ինչպէս նաեւ մեր շուրջ համախմբւած ընտրապայքարի բոլոր մասնակիցներին։

է. Այս ընտրութիւններում Հ. Յ. Դաշնակցութեան արձանագրած նկատելի առաջընթացը պարտաւորեցնող է։ Մենք շարունակելու ենք հետեւողականօրէն իրագործել մեր գաղափարներն ու ծրագրերը՝ հաւատարիմ ՀՀ քաղաքացիներին տրւած՝ նոր սկիզբ դնելու, ազատ, արդար, խաղաղ, բարեկեցիկ Հայաստան ունենալու խոստմանը։

ՀԱՅ ՅԵՂԱՓՈԽԱԿԱՆ ԴԱՇՆԱԿՑՈՒԹԵԱՆ
ՀԱՅԱՍՏԱՆԻ ԳԵՐԱԳՈՅՆ ՄԱՐՄԻՆ
05 ապրիլի 2017 թ.

Յարակից լուրեր

Հեղինակություն © 2011-2017 «ԱԼԻՔ» Օրաթերթ։ Բոլոր իրավունքները պահպանված են։