Հա

Ազգային

15/04/2018 - 09:25

Այս կամ այն քաղաքական ուժը կամ անձնաւորութիւնը ջնջելու պատերազմներ ու պայքարներ եզրը գործածելու ժամանակաշրջանը աւարտած է

ՀՅԴ Կեդրոնական կոմիտէին կողմէ Լիբանանի երեսփոխանական ընտրութիւններուն միայն մէկ կուսակցական թեկնածու առաջադրելու որոշումին անդրադառնալով, երեսփոխան Բագրատունի ընդգծեց, որ Հայ Յեղափոխական Դաշնակցութիւնը 50 տարիէ ի վեր կուսակցական միայն մէկ թեկնածու առաջադրելու աւանդութիւնը կը շարունակէ` աւելցնելով, որ 2000-ի ընտրութիւններուն միակ անգամ էր, որ երկու կուսակցական թեկնածուներ առաջադրուած են ՀՅԴ-ի կողմէ:

ՀՅԴ Լիբանանի Կեդրոնական կոմիտէի ներկայացուցիչ, երեսփոխան Յակոբ Բագրատունի երէկ գիշեր դարձաւ «Էմ. Թի. Վի.» պատկերասփիւռի կայանի «Թոք աֆ տը թաուն - Հատիս էլ Պալատ» յայտագիրին հիւրը:

Ընկերային բնոյթ ունեցող այս յայտագիրին ընթացքին կատարած իր յայտարարութիւններուն մէջ երեսփոխան Բագրատունի յայտնեց, որ ինք երրորդ անգամն է, որ կը հիւրընկալուի այդ յայտագիրին կողմէ:

Ապա հարցումի մը պատասխանելով, Յ. Բագրատունի ըսաւ, որ 2018-ի երեսփոխանական ընտրութիւններուն ՀՅԴ Լիբանանի Կեդրոնական կոմիտէին ընտրական կարգախօսն է «Միասնաբար, ամբողջ Լիբանանի համար»:

ՀՅԴ Կեդրոնական կոմիտէին կողմէ Լիբանանի երեսփոխանական ընտրութիւններուն միայն մէկ կուսակցական թեկնածու առաջադրելու որոշումին անդրադառնալով, երեսփոխան Բագրատունի ընդգծեց, որ Հայ Յեղափոխական Դաշնակցութիւնը 50 տարիէ ի վեր կուսակցական միայն մէկ թեկնածու առաջադրելու աւանդութիւնը կը շարունակէ` աւելցնելով, որ 2000-ի ընտրութիւններուն միակ անգամ էր, որ երկու կուսակցական թեկնածուներ առաջադրուած են ՀՅԴ-ի կողմէ:

«Սկզբունքը այն է, որ կազմուի Հայկական երեսփոխանական պլոքը, որուն անդամները կուսակցականներ չըլլան, այլ ներկայացնեն լիբանանահայութեան տարբեր շերտերը, ինչպէս նաեւ համաձայն ըլլան հայկական այլ կուսակցութիւններու հետ: 1992-ին եւ 1996-ին Հնչակեան կուսակցութեան թեկնածու առաջադրուած էր եւ Հայկական երեսփոխանական պլոքին մաս կը կազմէր: Սակայն նկատի ունենալով, որ ընտրական այս օրէնքը հնարաւորութիւններ չ՛ընձեռեր, որպէսզի բոլորս միասնաբար մեր թեկնածութիւնը առաջադրենք, մենք կրցանք համաձայնութիւն գոյացնել Հնչակեան կուսակցութեան հետ` Պէյրութի Ա. ընտրաշրջանին մէջ նոյն ընտրացանկին վրայ ըլլալու եւ երեսփոխան Սեպուհ Գալփաքեանը ո՛չ միայն Հնչակեան կուսակցութեան թեկնածուն նկատելու, այլեւ` Մուսթաքպալ հոսանքին ներկայացուցիչը», յայտնեց ան:

Մեթնի մէջ երեսփոխան Միշել Մըրի, Ազգային ազատ հոսանք եւ Ղովմի կուսակցութիւններուն միջեւ ընդարձակ դաշինք մը գոյացնելու ՀՅԴ-ի ճիգերուն ձախողութեան պատասխանատուութեան եւ երեսփոխան Մըրը ջնջելու պայքարին մասին հարցումներուն պատասխանելով` Յ. Բագրատունի ըսաւ, որ այս կամ այն քաղաքական ուժը կամ անձնաւորութիւնը ջնջելու պատերազմներ ու պայքարներ եզրը գործածելու ժամանակաշրջանը աւարտած է:

Ան նշեց, որ Մեթնի մէջ ընդարձակ դաշինք կարելի չէ եղած գոյացնել ընտրական օրէնքին պատճառով: «Քուէներու մօտաւոր հաշուարկի հիման վրայ ի յայտ եկաւ, որ Ազգային ազատ հոսանք կուսակցութեան եւ Մըրի միջեւ ընտրական շահեր չկան, հետեւաբար ընդարձակ դաշինքի նախաձեռնութիւնը չյաջողեցաւ: Ապա ՀՅԴ Կեդրոնական կոմիտէն հանդիպում մը ունեցաւ երեսփոխան Մըրի հետ, եւ ծանօթ է բոլորին, որ մենք հինէն ի վեր բարեկամներ ենք, 56 տարուան բարեկամութիւն գոյութիւն ունի: Հանդիպումին ընթացքին ի յայտ եկաւ, որ ո՛չ Մըրի, եւ ո՛չ ալ ՀՅԴ-ի շահերուն կը ծառայէ նոյն ընտրացանկին մաս կազմելը, որովհետեւ հաւանականութիւնը մեծ էր, որ կա՛մ Մըր եւ կա՛մ ՀՅԴ-ի թեկնածուն ձախողի: Անշուշտ այս մասին Մըր խոր հասկացողութիւն ցուցաբերեց եւ շեշտեց. «Ես չեմ, որ 50 տարուան բարեկամութենէ ետք ՀՅԴ-ի թեկնածուն կը ձախողեցնեմ», եւ Մեթնի հայ առաքելական թեկնածու մը չառաջադրեց: Ի դէպ 2009-ին` Փաղանգաւոր կուսակցութեան ղեկավար, երեսփոխան Սամի Ժեմայէլի հետ կազմած իր ընտրացանկին մէջ եւս, Մըր Մեթնի հայ առաքելական թեկնածու մը չառաջադրեց», յայտնեց երեսփոխան Բագրատունի:

Պէյրութի Ա. ընտրաշրջանին մէջ ընտրական նոր օրէնքին գործադրութեան ակնարկելով, երեսփոխան Բագրատունի նշեց, որ Պէյրութի Ա. ընտրաշրջանի ներկայ բաժանումներով ՀՅԴ-ի համար շատ աւելի յարմար էր մեծամասնական ընտրական օրէնքին` 1960-ի ընտրական իսկական օրէնքին հիման վրայ ընտրութիւններ կատարել: «Բայց եւ այնպէս, այս ընտրութիւնները աւելի յուսադրիչ են, քան 2000-ի, 2005-ի եւ 2009-ի ընտրութիւնները, որովհետեւ աւելի մեծ թիւով երեսփոխաններ ունենալու յոյսը մեծ է», ըսաւ ան:

Յայտագիրին ընթացքին նշուեցան Լիբանանի վարչակազմին զօրակցելու, երկխօսութեան ջատագովը ըլլալու, ինչպէս նաեւ հաւասարակշռուած քաղաքականութիւն վարելու ՀՅԴ-ի դերակատարութիւնը, որուն կողքին սակայն անդրադարձ կատարուեցաւ Քաղաքացիական ընկերութեան կողմէ

ՀՅԴ-ի ուղղուող այն ամբաստանութեան, որ Դաշնակցութիւնը Պուրճ Համուտը աղբերու մէջ խեղդած է:

Վերոնշեալ այս անդրադարձին երկրորդ բաժինին ակնարկելով` Յ. Բագրատունի ըսաւ, որ ինք օրական դրութեամբ Պուրճ Համուտի մէջ է` առաւօտեան ժամերէն ուշ գիշեր, հետեւաբար իրազեկ է տիրող կացութեան. ըստ անոր, մարդոց յիշողութիւնը թարմացնելու համար պէտք է ըսել, որ տարիներ շարունակ դէպի Պուրճ Համուտ բերուած էին այլոց աղբերը եւ գոյացած 45 մեթր բարձրութեամբ աղբի լեռ մը, իսկ 2016-ին Լիբանանը ողողած աղբերը հասած էին մարդոց պատշգամները: «Մենք փորձեցինք կառավարութեան հետ գործակցիլ ու լուծում մը գտնել աղբի տագնապին եւ վերացնել այդ աղբակոյտը: Ներկայիս Պուրճ Համուտի մէջ գոյութիւն ունի թափօններու թաղման վայր եւ ոչ թէ աղբանոց, իսկ եթէ այդ մասին կասկածներ կան, ապա կարելի է հարց տալ Բարգաւաճման եւ վերաշինութեան խորհուրդին: Անշուշտ քննադատութիւնները այս օրերուն մեծաթիւ են եւ պիտի ըլլան` նկատի ունենալով, որ ընտրութիւններու շրջանին կը գտնուինք: Վեց ամիս կամ մէկ տարի առաջ հաւաքեցինք աղբը եւ զայն տեսակաւորումի ղրկեցինք, ապա կառավարութեան նիստին որոշում տրուեցաւ աղբակոյտը վերացնելու, եւ այսօր կը գործադրենք ծովեզերքի մաքրութեան ծրագիրը. այս մասին ոչ ոք կը խօսի, որովհետեւ հիմնական նպատակը Պուրճ Համուտը չէ: Երբ Պուրճ Համուտի մասին կը խօսին, կը մոռնան Ժտէյտէն, ուր նաեւ թափօններու թաղման վայր գոյութիւն ունի, բայց Ժտէյտէի մէջ Դաշնակցութիւն չկայ, Պուրճ Համուտի մէջ կայ, ուրեմն հիմնական նպատակը ՀՅԴ-ն է եւ ոչ` Պուրճ Համուտը: Այս մասին խօսող բոլոր անհատները կրնային խօսիլ, եւ վստահ, որ անոնք մեզմէ աւելի «զօրաւոր» էին, բայց ի՞նչ ըրին: Ճամբաները փակեցին եւ պատճառ դարձան, որ մարդիկ աղբի մէջ լողան», ըսաւ ան:

Երեսփոխան Բագրատունի նշեց. «Եթէ ես որոշեցի այսօր «Էմ. Թի. Վի.» պատկերասփիւռի կայանէն հրաժարականս յայտարարել` ՀՅԴ Կեդրոնական կոմիտէի ներկայացուցիչի պաշտօնէն եւ միացումս` Քաղաքացիական ընկերութեան, ո՞վ կը հաւատայ: Երբ դաստիարակութիւնդ, կեանքդ եւ գործունէութիւնդ` քսան, երեսուն տարուան ընթացքին կուսակցութեան մը նուիրուած է, եւ յանկարծ ընտրական պատճառներով ստիպուիս կուսակցութիւնդ ձգել, քաղաքացիական ընկերութիւն կը դառնա՞ս», հարց տուաւ ան:

Երեսփոխան Բագրատունի հաստատեց, որ քաղաքական առումով հայութեան կեանքը հիմնուած է հայկական տարբեր կուսակցութիւններուն վրայ, «եւ նկատի ունենալով այս իրականութիւնը, կը նախընտրենք, որ երեսփոխան ընտրուին հայկական կուսակցութիւններուն թեկնածուները` ըլլան անոնք կուսակցական կամ կուսակցութեան կողմէ առաջադրուածներ, որպէսզի անոնք իսկական ներկայացուցիչները ըլլան հայկական իրականութեան», աւելցուց ան:

Ընտրական կաշառքին ակնարկելով` Յ. Բագրատունի հաստատեց, որ կաշառողէն շատ աւելի յանցաւոր է ա՛ն, որ իր քուէն կը ծախէ, որովհետեւ իր խիղճն ու արժանապատուութիւնը վաճառած կ՛ըլլայ, ապագայ սերունդներուն հաշուոյն մեծապէս սխալ կը գործէ եւ անոր արտօնուած է յաջորդող չորս տարիներուն լուռ մնալ:

Յայտագիրին ընթացքին Յ. Բագրատունի նշեց նաեւ, որ 1975-ի Լիբանանի քաղաքացիական պատերազմի բռնկման նախօրեակին պէտք է յարգել այդ տարիներուն զոհուած բոլոր նահատակներուն յիշատակը անխտիր:

Ան ըսաւ նաեւ, որ շրջանին ժողովուրդները յանցաւոր են, որովհետեւ անոնք կ՛արտօնեն օտարներուն եւ Իսրայէլի, որ իրենց ներքին հարցերուն միջամուխ դառնան:

«Ազդակ»

Յարակից լուրեր

  • ՀՅԴ Լիբանանի Կեդրոնական կոմիտէն այցելեց նախագահ Աունի
    ՀՅԴ Լիբանանի Կեդրոնական կոմիտէն այցելեց նախագահ Աունի

    ՀՅԴ Լիբանանի Կեդրոնական կոմիտէի պատուիրակութիւն մը, որուն մաս կազմեցին Կեդրոնական կոմիտէի ներկայացուցիչ, երեսփոխան Յակոբ Բագրատունի եւ զբօսաշրջութեան նախարար Աւետիս Կիտանեան, երէկ այցելեց հանրապետութեան նախագահ զօր. Միշէլ Աունի: 

  • ՀՅԴ Լիբանանի Կեդրոնական կոմիտէին տեսակցութիւնը Սփիւռքի նախարարին հետ
    ՀՅԴ Լիբանանի Կեդրոնական կոմիտէին տեսակցութիւնը Սփիւռքի նախարարին հետ

    Լիբանան կատարած եռօրեայ այցելութեան ծիրին մէջ, երէկ յետմիջօրէի ժամը 4:00-ին, սփիւռքի նախարար Մխիթար Հայրապետեան, նախարարութեան Մերձաւոր Արեւելքի եւ հայ համայնքներու վարչութեան պետ Լեւոն Անտոնեանի եւ դեսպան Սամուէլ Մկրտչեանի ներկայութեամբ, Հայաստանի դեսպանատան մէջ ընդունեց ՀՅԴ Լիբանանի Կեդրոնական կոմիտէն ներկայացնող պատուիրակութիւն մը` գլխաւորութեամբ Կեդրոնական կոմիտէի եւ Հայկական երեսփոխանական պլոքի ներկայացուցիչ Յակոբ Բագրատունիի:

  • Յ. Բագրատունի. «Մեզ ապրեցնողը եւ հզօրացնողը այն գիտակցութիւնն է, որ մենք ուրիշներէ տարբեր ենք»
    Յ. Բագրատունի. «Մեզ ապրեցնողը եւ հզօրացնողը այն գիտակցութիւնն է, որ մենք ուրիշներէ տարբեր ենք»

    ՀՅԴ Լիբանանի Կեդրոնական կոմիտէի ներկայացուցիչ, երեսփոխան Յակոբ Բագրատունի «Վանայ ձայն»-ին հետ ունեցած իր հարցազրոյցին ընթացքին անդրադարձաւ Հայաստանի վարչապետ Նիկոլ Փաշինեանի հետ Լիբանանի Կեդրոնական կոմիտէի հանդիպումին, լիբանանահայութեան ներկայ իրավիճակին եւ գաղութը յուզող հարցերու:

  • Նախագահ Աուն ընդունեց Լիբանանի հայոց թեմի առաջնորդն ու երեսփոխան Բագրատունին
    Նախագահ Աուն ընդունեց Լիբանանի հայոց թեմի առաջնորդն ու երեսփոխան Բագրատունին

    Լիբանանի Հանրապետութեան նախագահ զօր. Միշէլ Աուն երէկ նախագահական պալատին մէջ ընդունեց Լիբանանի հայոց թեմի առաջնորդ Շահէ եպս. Փանոսեանն ու ՀՅԴ Կեդրոնական կոմիտէի ներկայացուցիչ, երեսփոխան Յակոբ Բագրատունին: 

  • «Միայն դատաիրաւական ճանապարհով». Երեսփոխան Յակոբ Բագրատունիի սպասելիքը հայրենի իշխանութիւններէն
    «Միայն դատաիրաւական ճանապարհով». Երեսփոխան Յակոբ Բագրատունիի սպասելիքը հայրենի իշխանութիւններէն

    ՀՅԴ Լիբանանի Կեդրոնական կոմիտէի ներկայացուցիչ, երեսփոխան Յակոբ Բագրատունի հարցազրոյց մը տուաւ «Արեւելք»-ին (հարցազրոյցը վարեց Վարդուհի Արզումանեան): Վերջին տասնամեակին լիբանանահայ քաղաքական կեանքին մէջ ազդեցիկ եւ կարեւոր դեր ստանձնած Բագրատունի խօսեցաւ յատկապէս ներհայաստանեան վերջին զարգացումներուն մասին` շեշտադրելով, որ այսօր ամէն բանէ աւելի Հայաստանի իշխանութիւնները պարտաւոր են կտրուկ քայլեր առնելով կասեցնել արտագաղթի վտանգաւոր երեւոյթը:

Հեղինակություն © 2011-2017 «ԱԼԻՔ» Օրաթերթ։ Բոլոր իրավունքները պահպանված են։