Հա

Ազգային

21/04/2018

Հրանտ Մարգարեանը՝ վերջին իրադարձութիւնների ու ՀՅԴ նախաձեռնութեան մասին

Հայաստանում տեղի ունեցող վերջին իրադարձութիւնների մասին, Հայաստանի հանրային հեռուստաընկերութեան «Օրակարգից դուրս» հաղորդաշարը զրուցել է ՀՅԴ Բիւրոյի ներկայացուցիչ Հրանտ Մարգարեանի հետ:

Հայաստանում տեղի ունեցող վերջին իրադարձութիւնների մասին, Հայաստանի հանրային հեռուստաընկերութեան «Օրակարգից դուրս» հաղորդաշարը զրուցել է ՀՅԴ Բիւրոյի ներկայացուցիչ Հրանտ Մարգարեանի հետ:

 

Այս օրերի զարգացումների եւ իրադարձութիւնների հանգուցալուծման մասին զրուցելու ենք ՀՅԴ Բիւրոյի ներկայացուցիչ Հրանտ Մարգարեանի հետ: Պարոն Մարգարեան, արդէն որերորդ օրն է շարունակւում են Նիկոլ Փաշինեանի եւ նրա կողմնակիցների բողոքի ակցիաները: Ի՞նչ է կատարւում Երեւանի փողոցներում:

- Ժողովրդի մի մասը փողոց է դուրս եկել եւ դա վկայութիւնն է այն բանի, որ երկրում առկայ են դժգոհութիւններ: Մենք գիտենք, որ դժգոհութիւններ կան: Դրանք վերացնելու առումով, մենք արդէն նախաձեռնութիւններ ունէինք, նոյնիսկ դրա հետ կապւած գնացել էինք համագործակցութեան Հանրապետական կուսակցութեան հետ եւ ստորագրել համապատասխան համաձայնագիր, միասին աշխատելու, այդ պատճառները վերացնելու համար: Սա առաջին փաստն է, որ արձանագրւում է:

Երկրորդ փաստն այն է, որ մեր ճիգն ու ջանքը բաւարար արդիւնք չէին տւել, դանդաղ էր ընթացքը եւ հէնց դա պատճառ դարձաւ, որ ժողովուրդը առիթն օգտագործի ընտրութիւնների հարցում եւ դուրս գայ փողոց: Մինչեւ այստեղ դրական է: Այն, որ փողոցում չկան բախումներ, տհաճ երեւոյթներ, ժողովուրդը իր պարզ բողոքն ու դժգոհութիւնն է արտայայտում, դրական է: Հարցն այն է, որ մենք կարողանանք այս ամէնից դրական եզրահանգումներ անել: Շատ անգամներ դա տեսել են Հայաստանում. Ստեփան Դեմիրճեանը, Րաֆֆի Յովհաննիսեանը, Սասնայ ծռերը… Ամէն անգամ Դաշնակցութիւնը հրապարակ է իջել միջնորդութիւններով, որ կարողանայ ստեղծւած վիճակը օգտագործել երկրում հիմնական հարցեր լուծելու համար: Յաճախ ուժերը առաջնորդւել են ամէն ինչ կամ ոչինչ սկզբունքով եւ ոչ մի կողմը դրանից չի շահել: Այս անգամ, յոյս ունեմ, որ Դաշնակցութեան երկխօսութեան, բանավէճի նախաձեռնութիւնը, հարթակ ստեղծելու ՝արդիւնք կունենայ, որի մասին նշւում է նաեւ մեր յայտարարութեան մէջ: Փաստ է, որ մենք կարող ենք այսօր, այս ստեղծւած իրավիճակում ամենաճիշտ արդիւնքը քաղել:

 

Ստեղծել քաղաքական խորհրդածութիւնների հարթա՞կ:

- Այո, արդէն յայտարարութիւնը հրապարակւել է, մենք սկսել ենք խօսել բոլոր ուժերի հետ, որպէսզի բոլորին համոզենք, որ այդ հարթակի շուրջ, որտեղ կոնսենսուսով (համախորհուրդ) պէտք է որոշում կայացւի, պէտք է բոլոր հարցերը քննութեան նիւթ դառնան: Յոյս ունեմ, որ սա մենք կը յաջողենք եւ այս վիճակը, որ ստեղծւել է դրսում, դրանից կարողանանք առաւելագոյն օգուտ քաղել: Հարցն այն է, որ մեր երկիրը շատ նուրբ իրավիճակում է, արտաքին սպառնալիքը իրական սպառնալիք է եւ ամէն վայրկեան կարող է վերածւել իրական վտանգի: Մեր երկիրը դիւրաբեկ է, դրա համար բոլորս պէտք է շատ զգոյշ լինենք: Պէտք է հասկանանք, որ մեր երկիրը, մեր ժողովուրդը մեղք են: Չպէտք է թողնենք, որ այս ամէնը սխալ ուղղութեամբ ընթանայ, երկիրն ու ժողովրդին տանի տկարացման: Ընդհակառակը, այս ամէնը պէտք է տանենք մի ուղիով, որից երկիրն ու ժողովուրդը հզօրացած, ուժեղացած դուրս կը գան: Սա է մեր առաջարկութիւնը: Դժգոհութեան պատճառները պէտք է վերացւեն, պէտք է հիմնական փոփոխութիւններ արւեն:

 

Այսինքն, այստեղ անելի՞ք ունեն իշխանութիւնները:

- Բնականաբար, իշխանութիւնն էլ ունի, ընդդիմութիւնն էլ:

 

Ով ի՞նչ պէտք է անի. շատ յստակ:

- Իշխանութիւնը պէտք է կարողանայ հասկանալ, որ առկայ է դժգոհութիւն եւ պահանջ կայ, որ ինչ որ երեւոյթներ արագ տեմպերով սրբագրւեն երկրում, որ պատրաստ լինի զիջումներ անելու, նաեւ ընդդիմութեան դերակատարութիւնը հզօրացնելու իմաստով:

 

Լծակնե՞ր տալու:

- Այո: Ընդդիմութիւնն էլ պէտք է հասկանայ, որ չի կարող առաջնորդւել ամէն ինչ կամ ոչինչ սկզբունքով: Այս շարժումից, այս անգամ, պէտք է առաւելագոյն արդիւնք ստանանք: Ընդդիմութիւնն էլ պէտք է հասկանայ, որ այս շարժումը պէտք է առաջ տանի ժողովրդավարական սկզբունքներին համահունչ: Ինչպէս որ մինչեւ օրս եղել է: Նա չպէտք է փորձի ուրիշներին կամք պարտադրել: Պէտք է փորձի երկրի, ժողովրդի շահով առաջնորդւել եւ առաւելագոյնը ստանայ, նրանից ինչ կարող է ստանալ: Կարծում եմ այս երկխօսութիւնը կարեւոր է, անհրաժեշտ է, որ մենք ի սկզբանէ համոզւենք, որ առանց նախապայմանների ենք խօսելու, որ ամենքս համոզւած պէտք է լինենք, որ կոնսենսուսով խօսակցութիւնը կաւարտւի: Ես վստահ եմ, որ կայ դրա հնարաւորութիւնը: Վստահ եմ, քանի որ մեր երկիրը, մեր ժողովուրդը դրա անհրաժեշտութիւնն ունի: Մենք չպէտք է թողնենք, որ երկիրն ու ժողովուրդը կոտրւեն, երկիրը կոտրւի՝ արտաքին վտանգների առումով, դրա համար ժողովուրդը այս անգամ չպէտք է ձախողւի: Այս անգամ ժողովուրդը պէտք է արդիւնք ստանայ: Եւ այդ արդիւնքի համար պէտք է բծախնդիր լինենք բոլորս: Բոլորս անխտիր՝ սկսած իշխանութիւնից, վերջացրած ընդդիմութեամբ:

 

Պարոն Մարգարեան բողոքող ցուցարարները պայքարում են Սերժ Սարգսեանի վարչապետութեան դէմ: Գոնէ առաջին օրերին կոչերն այդպիսին էին: Այսօր, ի՞նչ է պատրաստ իշխանութիւնը տալ բողոքողներին: Եւ ի՞նչ են պահանջում Նիկոլ Փաշինեանը եւ նրա կողմնակիցները:

- Ի՞նչ են պահանջում, իբրեւ երեւոյթ, որ արծարծում են, տարբեր է: Տարբեր է եթէ ժողովրդին տոն տւող պատճառները բնականաբար ուրիշ են. Երկրի մէջ առկայ կոռուպցիան է, մենաշնորհներն են, անարդարութեան երեւոյթները, հովանաւորչութիւնը, ամենաթողութիւնը: Նմանատիպ երեւոյթներն են, որ պատճառ է դառնում ժողովրդի դժգոհութեան: Եւ այդ դժգոհութիւնը որոշների մօտ արտայայտւում է վարչապետին մերժելու պահանջով: Սակայն բուն հարցը այն երեւոյթներն են, որոնք պատճառ են հանդիսացել այդ տեսակ պահանջ ձեւաւորւելուն: Այդ բուն երեւոյթներն է անհրաժեշտ սրբագրել:

 

Այսինքն, խնդիրը համակարգի եւ ոչ անձերի մէջ տեսնելն է:

- Վստահ եմ որ այդպէս է: Ասեմ, մենք ինչ լուծում ենք առաջարկում: Մենք ընդունել ենք այս Սահմանադրութիւնը: Այս Սահմանադրութեան հիմքի վրայ խորհրդարանական ընտրութիւններն են կազմակերպւել, այս Սահմանադրութեան հիմքի վրայ ձեւաւորւել է այս խորհրդարանը, Սահմանադրութեան հիմքի վրայ խորհրդարանը ընտրել է նախագահ եւ ունեցել վարչապետ: Այս առումով մենք ելք չունենք: Ելքը կամ ցնցումներն են՝ երկրում անկայուն իրավիճակ, քաոս ստեղծելը, որը կը կոտրի երկիրը եւ կամ դրանց պատճառները վերացնելը, որպէսզի ժողովուրդը սրա միջից շահող դուրս գայ, եւ երկիրն առաջ գնայ: Մեր բոլոր միջամտութիւնները, որ արել ենք այս նկատառումով են եղել: Այսօր էլ նոյնն ենք անում: Կոալիցիա ենք կազմել, որ այդ պատճառները վերացնենք: Այսօր փողոցում կայ մէկ պահանջ, որ աւելի է հզօրացնում մեր դիրքերը՝ պատճառները վերացնելու մեր ջանքերը: Մենք այդ առումով ենք ուզում շահել՝ ցոյց տալ ելք, ճանապարհ: Եթէ անձ կը փոխւի, հանրապետականը մէկ ուրիշ թեկնածուի ներկայացնի, նրան էլ մի հազար հոգի չընդունեն, դա ելք չի, դա մեզ տեղ չի հասցնի: Պէտք է պատճառները վերանան, վերանան այնպէս, որ ոչ ոք չկարողանայ այս բացասական երեւոյթների վրայ իշխանութիւն ձեւաւորել:

 

Պարոն Մարգարեան ստեղծւած իրավիճակում ամենամեծ անելիքը ո՞ւմն է, այս կողմինը, թէ՞ այն կողմինը:

- Իշխանութեանն է: Իշխանութիւնն աւելի մեծ անելիք ունի:

 

Երբ ասում էք իշխանութիւն, նաեւ ձե՞զ նկատի ունէք եւ Հանրապետականին:

- Այո: Մեր չափով նախաձեռնութիւն արդէն ունեցել ենք: Բնականաբար: Եւ նաեւ ընդդիմութիւն կամ, այսպէս ասած, ժողավրդային դժգոհութիւնն այսօր մարմնաւորող ուժն է, որը հրապարակի վրայ է:

 

Իսկ Նիկոլ Փաշինեանի խմբակցութեան գործընկերնե՞րը:

- Կարծում են նրանք իրարից տարբերւում են միայն այնքանով, որ մէկը չի ընդունում միւսի այս պահի գործունէութըան ձեւը: Թէ չէ ըստ էութեան նրանք շատ էլ չեն տարբերւում իրարից: Սակայն մենք ասում ենք, որ խորհրդակցութեան սեղանի շուրջ, ուր պէտք է հաւաքւենք խորհրդարանական բոլոր ուժերը պէտք է լինեն: «Ելք»-ը նաեւ այդ երեք կուսակցութիւնների ղեկավարութեամբ պէտք է ներկայութիւն ունենայ, որովհետեւ այս պահին այնտեղ չկայ միասնականութիւն: Մենք ուզում ենք տալ առաւելութիւն, որ երեք + երեք ձեւաչափով խորհրդակցութեան սեղան ձեւաւորւի, որտեղ կարողանանք ելք գտնել երկրում առկայ դժվարութիւնները յաղթահարելու հարցում:

 

Պարոն Մարգարեան, շատ անկեղծ, կարծում էք Նիկոլ Փաշինեանը պատրա՞ստ է ընդունել ձեր մեկնած ձեռքը , քաղաքական խորհրդակցութիւնների հարթակ էք առաջարկում ստեղծել:

- Այնքանով, որ ես հետեւել եմ այս քաղաքական գործչի գործունէութեանն ու տրամաբանութեանը, կարծում եմ ինքն այնքան խելացի է, հասկանալու համար, որ այս ճանապարհը թէ իր համար է ելք, թէ երկրի եւ թէ բոլորի: Այլ ճանապարհը իր մօտ… Ինչ որ իմաստով գուցէ յոյս ունենայ համընդհանուր յեղափոխութեան, բայց ես ուզում եմ, որ այն վիճակը, որ Փաշինեանը ստեղծել է երկիրը կարողանայ դրանից օգտւել, պատճառ դառնայ, որ երկիրը դրանով կարողանայ թռիչքային քայլ անել դէպի առաջ, այդ ձեռքբերումն ինքն ունենայ: Նախապէս ասեցի, Սասնայ ծռեր, Րաֆֆի Յովհաննիսեան, Ստեփան Դեմիրճեան, Լեւոն Տէր-Պետրոսեան, չունեցան այդքան խելացիութիւն, համարձակութիւն եւ ճկունութիւն, որպէսզի դրան վերածեն այն ձեռքբերումը, որ ունեցել էին հրապարակի վրայ, փողոցում: Դա չկարողացան վերածել իրական առաւելութեան ՝ երկրի եւ ժողովրդի համար: Յոյս ունեմ, որ Նիկոլ Փաշինեանն այն քաղաքական գործիչն է, որ դա կանի: Դա կանի եւ դրանով ինքը բարձր տեղ կը նւաճի Հայաստանի քաղաքական դաշտում:

 

Խանգարողներ կան, կը լինե՞ն:

- Բնականաբար, խանգարողներ միշտ էլ կան: Բոլոր ուժերի կողքին էլ խանգարողներ կան. Մէկը խորհուրդ է տալիս մի զիջիր, ջարդիր գնայ առաջ, միւսը՝ ջարդիր, գնայ իշխանութիւնը վերցրու… Նման խորհրդատուներ կարող են լինել, կարող են լինել նաեւ մութ նպատակներ հետապնդող խորհրդատուներ, դրանք կարեւոր չեն, կարեւորը քաղաքական անձն է, ով եթէ վերցրել է առաջնորդի դրօշը պէտք է կարողանայ ժողովրդին ցոյց տայ խոհեմութիւն, ցույց տայ, որ ինքը չունի անձնական շահ, անձնական խնդիր երկրի թիւ 1-ը դառնալու, այլ ունի խնդիր երկրի մէջ հարց լուծելու եւ ժողովրդին բարեկարգ վիճակի հասցնելու: Դա իրեն առաջ հեռանկար կը բացի աւելի առաջ գնալու, աւելի մեծ ազդեցութիւն ունենալու Հայաստանի քաղաքական կեանքում:

 

Պարոն Մարգարեան Դաշնակցութիւնը առաջարկութիւն է արել, բայց միւս կողմից Դաշնակցութեանը քննադատողների պակաս, յատկապէս այս օրերին, կարծես չի զգացւում սոցիալական ցանցերում եւ ուրեմն կարծում էք այս ֆոնին ընդունելի կը լինի՞ եւ կը կարողանա՞ք կեանքի կոչել ձեր այս առաջարկութիւնը:

- Այն քաղաքական ուժը, որը երբեւէ կարող է մտածել, թէ ինքը կարող է հակառակորդ չունենալ, նշանակում է պէտք է գոյութիւն չունենայ: Այն ուժը որ գոյութիւն չունի, նաեւ հակառակորդ չունի:
Դաշնակցութիւնն իր կողքին միշտ ունեցել է հակադաշնակցութիւն: Դրան մենք ընտելացել ենք մեր ծննդեան օրից: Դա մեզ համար զարմանալի չի: Այսօր սակայն, այդ հարցի մէջ նոր նրբերանգներ են ի յայտ եկել: Կայ մի շերտ, որը քաղաքականացած չի եւ չի հասկանում , չի կարողանում ընկալել թէ Դաշնակցութիւնը , ինչ է անում, եւ ինչ է ուզում անել, ուր է գնում, ինչ ռազմավարութիւն, դերակատարութիւն ունի:

Դա միայն ի՞ր խնդիրն է, թէ՞ նաեւ Դաշնակցութեան:

- Բնականաբար Դաշնակցութեան խնդիրն է: Բայց կան մարդիկ՝ նաեւ մեր մէջ, մեր շուրջը, մեզ հարազատ մարդիկ, որ մեր շուրջն են, բայց աւելի շատ զգացական կապերով են մեզ կապւած, եւ ոչ քաղաքական այն ճանաչողութեամբ ու գիտակցութեամբ, որ քաղաքական կուսակցութիւնը պէտք է ունենայ: Դրանք մարդիկ են, որոնք Դաշնակցութեանն այնքան են սիրում, որ ուզում են, որ Դաշնակցութիւնը միշտ ծափահարւի: Նրանք չեն կարողանում հաշտւել այն մտքի հետ, որ Դաշնակցութիւնը քաղաքական կուսակցութիւն է՝ ունի իր ուղին, իր ռազմավարութիւնը, որը կարող է նաեւ ունենալ քննադատողներ, հակառակորդներ: Այսինքն միշտ ծափահարւել չի կարող Դաշնակցութիւնը եւ դա ողբերգութիւն չի: Կարեւորն այն է, որ մեզ կարողանան հասկանալ այնպէս, որ մենք միշտ աշխատում ենք Հայաստանի եւ հայ ժողովրդի շահերից ելնելով: Ծափահարել - չծափահարւելու հետ մենք հաշտ ենք, դա երկրորդական է, մի օր կարող ես ծափահարւել, մի օր՝ ոչ: Դա չէ, որ կարեւոր է: Կարեւրորը՝ որ այն ինչ Դաշնակցոյթիւնն անում է անկեղծ է անում, Հայաստանի ու հայ ժողովրդի, զարգացման լիարժէք հնարաւորութեան համար է անում:

 

Պարոն Մարգարեան ոստիկանների գործողութիւններն այս օրերին համաչա՞փ էին եւ ցուցարարների արարքներում քայլերում կա՞յ մի բան, որ ձեզ համար անընդունելի է:

- Երբ այդքան մեծ թւով ժողովուրդ է դուրս գալիս , շատ դժւար է կարգ ու կանոնի մէջ պահել բոլորին: Կը լինեն մարդիկ, որոնք ընդհանուր կանոներից դուրս կը գան: Այսօր ցոյցերի հինգերորդ օրն է, նկատելի է, որ ցուցարարների կողմից նւազագոյն հակաօրինական կամ ժողովրդավարութեան դէմ դէպքեր են եղել, որի համար ես ուրախ եմ նաեւ ողջունում եմ, որ այս ընթացքը շարունակւի, որովհետեւ բախումը ոչ միայն ցանկալի չի, այլեւ դէմ է ժողովրդային շարժման նպատակներին, երկրի կայունութեանը, հեղինակութեանը:

Երկրորդ՝ ոստիկանութիւնն է, որ մինչեւ այս պահը կարողացել է մնալ պարկեշտութեան, չափի, զսպւածութեան սահմաններում, որի համար ես դարձեալ ուրախ եմ, եւ ուզում եմ, որ այս ընթացքը շարունակւի: Մենք բախումը պէտք է բացառենք:

 

Եւ շարունակւի մինչեւ որտե՞ղ պրն. Մարգարեան: Անկախ մեր ցանկութիւններից, ի՞նչ ելք էք կանխորոշում: Խոհեմութիւն կը ցուցաբերե՞ն երկու կողմերն էլ եւ հանգուցալուծումը՝ եթէ ամփոփէք:

- Երկու բան չպէտք է պատահի, առաջին, բախման չպէտք է գնանք: Երկրորդ. չպէտք է անենք մի բան, որ արտաքին միջամտութեան անհրաժեշտութիւն, կարելիութիւն ստեղծւի: Եթէ կարողանանք այս երկու բանը չանել, որքան կուզի թող տեւի, դրանից միայն երկիրը կօգտւի եւ կարող է լուրջ օգուտներ քաղել, մենք կարող ենք մեր կեանքը փոխել եւ նոր որակի իշխանութիւն ձեւաւորել: Բայց նաեւ պէտք է հասկանանք, որ դա շատ դժւար, նուրբ աշխատանք է՝ թէ շարժումը ղեկավարողների առումով, եւ թէ ոստիկանութեան: Մենք մարդկային գործօնի հետ գործ ունենք՝ նուրբ զգայարաններ, նեարդեր: Կարող է մի փոքր առիթ բախման պատճառ հանդիսանայ, եւ հետեւանքը շատ ծանր լինել: Մենք չենք ուզում, որ դա տեղի ունենայ: Կարծում եմ շարժումը նաճել է այն իրաւունքը, որ այսօր կարողանայ դրա հետեւանքների առումով նոր ձեռքբերումների ձգտել:

 

Այն որ ցուցարարների մէջ մեծամասնութիւն են կազմում երիտասարդները, ինչի մասին է խօսում՝ պրն. Մարգարեան:

- Ուրախ եմ., որ մեր ուսանողութիւնը, երիտասարդութիւնը, քաղաքական օրակարգը իր համար դարձրել է հիմնական օրակարգ: Եւ որ նրանց մտահոգում է ազգի, երկրի, ժողովրդի ճակատագիրը եւ ինքն ուզում է դերակատար լինել: Կարեւոր չի որ ուղղութեամբ, կարեւոր չի որ քաղաքականութեան ռազմավարութեամբ, կարեւորը՝ որ ինքը երկրի քաղաքական ճակատագրի մէջ ուզում է դերակատար լինել: Ուզում եմ, դա քաղաքականացման մի նոր ընթացք ստեղծի երիտասարդութեան մէջ, որպէսզի նրանք կարողանան հասկանալ քաղաքական ուղղութիւնները, գործընթացները եւ քաղաքական ուղղութիւնների ընտրութեան հարցում ամբողջութեամբ ճիշտ ճանաչողութիւն ձեռք բերեն եւ քայլերը կատարեն գիտակցաբար:

 

- Շնորհակալութիւն զրոյցի համար պրն. Մարգարեան:

Յարակից լուրեր

Հեղինակություն © 2011-2017 «ԱԼԻՔ» Օրաթերթ։ Բոլոր իրավունքները պահպանված են։