Հա

Ազգային

29/09/2018 - 11:30

Չէի ցանկանայ, որ արհեստական սահմանազատումները վերածւէին իրական սահմանազատումների

«Առաւօտ»-ի զրուցակիցն է ՀՅԴ Բիւրոյի անդամ, ՀՅԴ խմբակցութեան պատգամաւոր Սպարտակ Սէյրանեանը:

«alikonline.ir» - «Առաւօտ»-ի զրուցակիցն է ՀՅԴ Բիւրոյի անդամ, ՀՅԴ խմբակցութեան պատգամաւոր Սպարտակ Սէյրանեանը:

 

- Երեւանի աւագանու ընտրութիւններից ի՞նչ տպաւվորութիւններ ստացաք: Շատերը չեն թաքցնում, որ իրենց համար անակնկալ էր «Քաղաքացիական պայմանագրի» հաւաքած 82% քւէն, ինչպէս նաեւ միւս կուսակցութիւնների՝ ԲՀԿ, «Լոյս» դաշինք, ՀՅԴ, չնչին տոկոսները: Շատերն անգամ շոկ են ապրել այս թւերից:

- Ես քաղաքական գործընթացների հետ կապւած շոկային տրամադրութիւններ երբեւէ չեմ ունեցել՝ վերջին 30 տարւայ ընթացքում: Եւ չեմ էլ կարծում, որ քաղաքական գործընթացներին պէտք է վերաբերւել նման յուզական տրամաբանութեամբ: Քաղաքականութիւնը դինամիկ գործընթաց է. մի քաղաքական ուժ կարող է յարաբերական յաջողութիւն ունենալ, միւսը՝ յարաբերական անյաջողութիւն, երրորդը՝ նոյնիսկ ձախողում, բայց դրանք շոկ չպէտք է առաջացնեն քաղաքականութեամբ զբաղւողների մօտ, այլ խորհելու, քննարկելու պատճառներն ու հետեւանքները հասկանալու տրամադրութիւններ: Սա՝ առաջին: Երկրորդ՝ զուտ իրաւական տեսանկիւնից Երեւանի աւագանու ընտրութիւնները միանգամայն լեգիտիմ են, շատ արդար են եւ ընթացակարգային բոլոր կանոնների պահպանմամբ են իրականացել: Այլ հարց, որ ընտրութիւն՝ բովանդակային իմաստով, իմ խորին համոզմամբ՝ տեղի չունեցաւ: Որովհետեւ քարոզարշաւի թէկուզեւ այդ փոքր հատւածը չտրամադրւեց Երեւան քաղաքի հիմնախնդիրների քննարկմանը եւ դրանց լուծումների առաջարկմանը: Ըստ էութեան ընտրութիւններն աւագանու էին, բայց քարոզարշաւի համար ընտրւել էին քաղաքական թեմաներ, որոնք որեւէ կապ չունէին Երեւանի հիմնախնդիրների եւ ընտրութիւնների բուն բովանդակութեան հետ: Այս տեսանկիւնից, այո, լուրջ խնդիր կայ, որովհետեւ ի վերջոյ ընտրութիւնների գործընթացը ինձ համար գոնէ չափելի է երեք չափանիշով՝ զուտ իրաւական տեսանկիւնից լեգիտիմութիւն, հանրային գիտակցութեան տեսանկիւնից լեգիտիմութիւն (որովհետեւ կարող է օրէնքի տառին համապատասխան ընտրութիւններ լինեն, բայց հանրային գիտակցութեան մէջ չլինի դրանց լեգիտիմութեան ընկալումը): Բայց ամենակարեւորն ինձ համար՝ առաւելապէս ոչ թէ քաղաքական գործիչ, այլ ՀՀ քաղաքացի, այն է, թէ իւրաքանչիւր ընտրութիւնից յետոյ ինչպէս է հասարակութիւնը մտնում ընտրական գործընթաց եւ ինչպէս է դուրս գալիս այդ գործընթացից: Եթէ ընտրական գործընթացն իր արդիւնքով հանդերձ տանում է հանրութեան կոնսոլիդացիայի, երբ յաղթողներ ու պարտւողներ կան ընտրութիւններում՝ թւաբանական իմաստով, այլ ոչ հասարակութեան մէջ, եւ ընտրութիւններում յաղթող քաղաքական ուժը հասկանում է, որ մասնակից միւս քաղաքական ուժերի ծրագրերը, մօտեցումները պէտք է ներառի իր գործունէութեան մէջ, երբ պարտւած քաղաքական ուժը հասկանում է, որ հնարաւորութիւն ունի իր գաղափարները, ծրագրերն ու մօտեցումները ի սպաս դնել յաղթող քաղաքական ուժին, այս արդիւնքն ինձ համար ամենագերադասելին է: Ցաւօք, համենայնդէպս՝ այս պահին, այնքան էլ հակւած չեմ գնահատել, որ մեր հասարակութիւնը միասնական դուրս եկաւ այս ընտրական գործընթացից: Շատ ու շատ ձեւախեղումներ, շատ ու շատ արտայայտութիւններ խորացրին հասարակութեան մէջ առանց այդ էլ գոյութիւն ունեցող քաղաքական եւ կողմնորոշումների տարաձայնութիւնները յանգեցրին թշնամանքի, կասկածանքի, պիտակաւորման, վիրաւորելու եւ այլն, եւ այլն: Յաճախ, ի դէպ՝ արհեստական, մտացածին որակումներն ու արհեստական սահմանազատումները ոչ թէ իրավիճակն են ֆիքսել, այլ քաղաքական նպատակադրումներ կամ ընտրական տակտիկայից բխող են եղել: Ես չէի ցանկանայ, որ արհեստական սահմանազատումները վերածւէին իրական սահմանազատումների: Հասկանալի է՝ ժամանակի ընթացքում կրքերը կը մարեն, ամէնը կը հանդարտւի, կանցնի… Հիմա ինձ հետաքրքիր է, թէ ընտրութիւններին մասնակցած քաղաքական ուժերը, մանաւանդ 80-ից աւելի տոկոս հաւաքած քաղաքական ուժը, ինչպէ՞ս կանդրադառնան քարոզարշաւի ընթացքում տեղ գտած այս երեւոյթները սրբագրելուն:

 

- Ֆորմալ առումով իշխող ուժը այդ 82 տոկոսով վստահութեան քւէ ստացաւ՝ արտահերթ խորհրդարանական ընտրութիւններ անցկացնելու համար, եւ դատելով արդէն իսկ հնչող յայտարարութիւններից՝ չի բացառւում, որ մինչեւ տարեվերջ արտահերթ խորհրդարանական ընտրութիւններ անցկացւեն: ՀՅԴ-ն աւելի վաղ յայտարարել էր արտահերթ խորհրդարանական ընտրութիւնների անցկացման անհրաժեշտութեան մասին: Երեւանի աւագանու ընտրութիւններում Դաշնակցութեան ստացած քւէները հնարաւո՞ր է ստիպեն վերանայել այդ որոշումը:

- Երբ խորհրդարանում հաստատւում էր կառավարութեան գործունէութեան ծրագիրը, այդ ծրագրի հետ մենք հաստատել ենք նաեւ այն կէտը, համաձայն որի՝ արտահերթ խորհրդարանական ընտրութիւններ պէտք է տեղի ունենան մէկ տարւայ ընթացքում: Այսինքն՝ այն ժամանակ էլ մենք գիտէինք, որ ընտրութիւնները արտահերթ են լինելու, եւ այդ կոնսենսուսով հաստատւած կառավարութեան ծրագրից բխեց նաեւ այդ կոնսենսուսով աշխատելու պատրաստակամութիւնը ընտրական օրէնսդրութեան փոփոխութիւնների յանձնաժողովում: Մեր տրամաբանութիւնն այն ժամանակ էլ, հիմա էլ այն է, որ երկրում տեղի ունեցող բոլոր գործընթացները, որոնք կը բերեն դրական հանգուցալուծումների, կարող են տեղի ունենալ ոչ թէ պարտադրանքի, քմահաճոյքի կամ «ուժի ցուցադրմամբ», այլ կոնսենսուսով, եթէ մենք ուզում ենք հանգուցալուծումից յետոյ նոր խնդիրներ չունենալ: Ենթադրում եմ՝ եկող շաբաթւայ ընթացքում կը սկսւեն քննարկումները, բանավէճերը, մենք կը ձգտենք յանգեցնել կոնսենսուսի, որ արտահերթ խորհրդարանական ընտրութիւնները, անկախ նրանից՝ դրանք տեղի կունենան մէկ-երկու կամ երեք ամիս յետոյ, տեղի ունենան քաղաքական բոլոր ուժերի կոնսենսուսի պայմաններում:

 

- Թէպէտ արտահերթ խորհրդարանական ընտրութիւնների անցկացման իրաւական հիմքերը դեռ տեսանելի կամ հասկանալի չեն, բայց իշխող քաղաքական ուժը ուժի դիրքերից է հանդէս գալիս, ընդհուպ սպառնալիքներ են հնչում խորհրդարանը «պաշարելու»…

- Քանի դեռ տեղի չեն ունեցել վարչապետի եւ խորհրդարանական խմբակցութիւնների հանդիպումները, մնացած բոլոր որակումները, ենթադրութիւնները, կարծիքները ես հակւած չեմ մեկնաբանել: Քանի դեռ արտահերթ խորհրդարանական ընտրութիւնների գնալու ճանապարհային քարտէզը գծագրւած չէ, ներառեալ նաեւ Ընտրական օրէնսգրքի փոփոխութիւնների այն ամբողջ աշխատանքը, որը կատարւել է կառավարութիւնում եւ խորհրդարանում, ես չէի մեկնաբանի հնարաւոր զարգացման սցենարները:

 

- Իսկ հաւանական համարո՞ւմ էք, որ ՀՀԿԾառուկյան» դաշինք-ՀՅԴԼոյս» եւ «Հանրապետութիւն» կոալիցիա ձեւաւորւի խորհրդարանում՝ ընդդէմ «Քաղաքացիական պայմանագրի»:

- Իսկ ինչո՞ւ ընդդէմ, գուցէ ՔՊ-ն կամ վարչապետն առաջարկում են այնպիսի մի բանաձեւ, որտեղ բոլոր նշւած քաղաքական ուժերը միաւորւում են յանուն Հայաստանի ապագայի:

 

- Իսկ Երեւանի աւագանու ընտրութիւններում հաւաքած չնչին տոկոսները ՀՅԴ-ին մտորելու եւ խորհելու ի՞նչ առիթներ են տւել: Հաւանակա՞ն է, որ առաջիկայում հրաժարւէք կառավարութիւնում ունեցած պորտֆելներից, քանի որ հանրային վստահութեան այդ քւէն, փաստօրէն, չունէք:

- Երեւանի աւագանու, եթէ չեմ սխալւում, սրանք արդէն 4-րդ ընտրութիւններն են: Առաջին երկու ընտրութիւններում էլ անցողիկ շեմը չենք յաղթահարել, երրորդ ընտրութիւններին ընդհանրապէս չենք մասնակցել: Այո, Երեւանն իր տեղով, դիրքով եւ մնացեալով հանրապետութեան կարեւորագոյն հատւածն է, բայց խորհրդարանական ընտրութիւնները վերաբերում են ամբողջ Հայաստանին, ոչ թէ միայն Երեւանին եւ որեւէ համայնքի, թէկուզեւ ամենամեծ, ընտրութիւններով, մի յաջողութիւնով կամ մի անյաջողութիւնով չի պայմանաւորւում քաղաքական կեանքը: Դրանք, իհարկէ, հաշւի են առնւում:

Զրոյցը՝ Նելլի Գրիգորեանի

Յարակից լուրեր

  • «Ապառաժ»-ի խմբագրական. Դաշնակցութեան ներկայութիւնը՝ աներկբայ ու անփոխարինելի
    «Ապառաժ»-ի խմբագրական. Դաշնակցութեան ներկայութիւնը՝ աներկբայ ու անփոխարինելի

    Հայ իրականութեան մէջ վերջին 30 տարիներին ձեւաւորւած քաղաքական դաշտում ժամանակ առ ժամանակ ականատեսը եղանք քաղաքական ուժերի, որոնք անամպ երկնքում անհետացող ասուպների նման մի պահ երեւացին ու անհետացան: Քաղաքականութեան մէջ լինելն ինքնին պատասխանատւութիւն է, պատասխանատւութիւն, որը պէտք է կարողանալ կրել յարատեւօրէն, իսկ այդ պատասխանատւութեան զգացումը արտացոլւում է այն ժամանակ, երբ քաղաքականութիւն ես մտնում գաղափարական հենքով:

  • Կեցցէ՛ Դաշնակցութիւնը
    Կեցցէ՛ Դաշնակցութիւնը

    Վահրամ Աթանեստանի արձագանգը գուցէ թողնէի անպատասխան, եթէ այն վտանգաւոր ուղերձներ չպարունակէր, եւ եթէ այդպէս մտածողները հրապարակում շատ չլինէին։ 

  • Ապատեղեկատւութիւնը կաթիլ-կաթիլ ազդում է մարդկանց վրայ
    Ապատեղեկատւութիւնը կաթիլ-կաթիլ ազդում է մարդկանց վրայ

    Սովորաբար չեմ զայրանում, բայց երբեմն աւելի զայրացկոտ բնոյթով եմ հանդէս գալիս, երբ դիպչում են ազգային արժէքներին, Դաշնակցութեանը դիպչելը նոյնպէս այդ կոնտեքստում եմ տեսնում. երէկ «Երկիր մեդիա» հեռուստաընկերութեան «Հարցեր` դաշնակցականներին» հաղորդման ժամանակ ասել է ՀՅԴ Հայաստանի Գերագոյն մարմնի անդամ Արթուր Եղիազարեանը:

  • ՀՅԴ ԳՄ անդամ. «Մենք համակարգի կայացման կողմնակից ենք»
    ՀՅԴ ԳՄ անդամ. «Մենք համակարգի կայացման կողմնակից ենք»

    ՀՅԴ Հայաստանի Գերագոյն մարմնի անդամ, տնտեսագէտ Արմէն Գրիգորեանը, որն Արարատի մարզում վարկանիշային կարգով առաջադրւել է պատգամաւորութեան թեկնածու, «Իրատես»-ի հետ զրոյցում հաւաստիացրեց՝ դաշնակցականներն առաջիկայ խորհրդարանական ընտրութիւններին մասնակցում են իշխանութիւն ունենալու համար։ Ըստ նրա՝ նախընտրական շրջանը հեշտ չէ, քանի որ մասնակցում է 11 ուժ, բայց ընտրապայքարին պէտք է դուրս գալ առաջինը լինելու ձգտումով: 

  • ՀՅԴ-ն, անկախ ընտրութեան արդիւնքներից, չի դադարելու հայ ժողովրդի կուսակցութիւնը լինելուց
    ՀՅԴ-ն, անկախ ընտրութեան արդիւնքներից, չի դադարելու հայ ժողովրդի կուսակցութիւնը լինելուց

    Մենք, առնւազն իմ գնահատմամբ, յաւակնում ենք բաւական լաւ ձայների, քանի որ խորհրդարանը առանց «Դաշնակցութեան» պատկերացնելը, կարծում եմ, որ անհնար է: Այս մասին «tert.am»-ի հետ զրոյցում ասաց ՀՅԴ-ական Արծւիկ Մինասեանը` անդրադառնալով արտահերթ խորհրդարանական ընտրութիւններին ՀՅԴ-ի շանսերին:

Ամենաշատ ընթերցւած

Քւէարկութիւն

Կը յաջողւի՞ արդեօք Արմէն Սարգսեանին նոր որակ մտցնել ՀՀ քաղաքական կեանքում:

Եղանակ

Հեղինակություն © 2011-2017 «ԱԼԻՔ» Օրաթերթ։ Բոլոր իրավունքները պահպանված են։