Հա

Քաղաքական

15/10/2018 - 14:10

«Ես երբեք չեմ փորձել հաճելի լինել մարդկանց, երբեք պոպուլիզմով չեմ զբաղւել». Քոչարեանը՝ «Bloomberg»-ին

«2rd.am»-ը ներկայացրել է ՀՀ երկրորդ նախագահ Ռոբերտ Քոչարեանի հարցազրոյցը «Bloomberg» մեդիաընկերութեանը՝ կրճատումներով: Տեքստը հայերէն թարգմանութեամբ կայքին է տրամադրել պաշտօնաթող նախագահի գրասենեակը: Գրասենեակի ղեկավարը կայքին հաղորդել է, որ ներկայացւող հատւածները ո'չ սկզբնաղբիւր ընկերութեան կայքում, ո'չ էլ հայկական ԶԼՄ-ներում չեն հրապարակւել:

«alikonline.ir» - «2rd.am»-ը ներկայացրել է ՀՀ երկրորդ նախագահ Ռոբերտ Քոչարեանի հարցազրոյցը «Bloomberg» մեդիաընկերութեանը՝ կրճատումներով: Տեքստը հայերէն թարգմանութեամբ կայքին է տրամադրել պաշտօնաթող նախագահի գրասենեակը: Գրասենեակի ղեկավարը կայքին հաղորդել է, որ ներկայացւող հատւածները ո'չ սկզբնաղբիւր ընկերութեան կայքում, ո'չ էլ հայկական ԶԼՄ-ներում չեն հրապարակւել: Գրում է «yerkir.am»-ը:

 

- Մեղադրանք առաջադրելուց յետոյ տւած հարցազրոյցներից մէկում Դուք ասացիք, որ զարմացած չէք մեղադրանքի համար։ Ինչո՞ւ չզարմացաք։

- Որովհետեւ տեղի ունեցող իրադարձութիւնների ողջ կոնտեքստը խօսում էր այն մասին, որ այդ մարդիկ, իշխանութեան գալով, անպայման կը փորձեն իրենց գործունէութեան ընթացքում այդ հարցին տալ առաջնահերթ նշանակութիւն։ Դրանից առաջ խորհրդարանական լսումներ էին տեղի ունեցել, յայտարարութիւններ, մեկնաբանութիւններ էին անում այդ հարցով։ Ակնյայտ էր, որ նրանք քայլեր են ձեռնարկում։

 

- Նկատի ունէք, որ դա ինչ-որ վենդետա, անձնական հա՞րց է:

- Իհարկէ: Հաշւի առէք, որ վարչապետը մարտիմէկեան իրադարձութիւնների գլխաւոր մասնակիցներից մէկն էր, եւ ընդհանրապէս, քաղաքական հաշիւներ մաքրելու եւ պատմութիւնն իր համար աւելի յարմար համատեքստում վերաշարադրելու փորձերում գլխաւոր գործիչներից մէկը: Մոտիւացիան այստեղ ակնյայտ է։

 

- Դուք հետ եկաք՝ ի պատասխան մղւող պայքարի։ Ըստ էութեան՝ Դուք վերադարձաք քաղաքականութիւն։ Ինչո՞ւ վերադարձաք։

- Ասում են, որ նախագահներն ընդհանրապէս քաղաքականութիւնից չեն հեռանում։ Ես վերջին տասնամեակում պասիւ եմ եղել, հանդէս եմ եկել տարին մէկ-երկու անգամ՝ գործող իշխանութեանն ուղղւած քննադատութեամբ, ելոյթ եմ ունեցել միայն այն հարցերով, որոնք հասարակական մեծ արձագանգ էին առաջացնում, եւ ես իմ պարտքն էի համարում արտայայտել իմ դիրքորոշումն այդ հարցերի շուրջ: Դա, այսպէս ասած, քաղաքական պասիւ մասնակցութիւն էր։ Սակայն այն, ինչ սկսեց տեղի ունենալ (ս. թ. մայիսից. խմբ.), ինձ շատ էր անհանգստացնում, եւ այստեղ անձնական հարց դրւած չէ: Հարցը պէտք է դիտարկել առաւել լայն համատեքստում։

 

- Ի՞նչ նկատի ունէք` «լայն համատեքստ» ասելով։

- Ես Հայաստանի պետականութեան համար բաւականին խնդրայարոյց իրավիճակ եմ տեսնում` կապւած այն փոփոխութեան հետ, յանուն որի ամէն ինչ սկսւեց մայիսին եւ ինչը փաստացի կատարւում է այժմ: Խնդրայարոյց այն հարցով, որ այս ամէնը տեղի է ունենում շատ մեծ էյֆորիայի ալիքի տակ, որն ունի դրական եւ բացասական կողմ։ Դրականը մարդկանց «ազատագրւելն է», այսպէս՝ զանգւածայնօրէն հանդէս գալն ընդդէմ բացասական երեւոյթների, որոնք երկրում տեղի էին ունենում: Սակայն դրա հետ միաժամանակ սա քաղաքական ամբողջ հարթակի դեֆորմացիա է եւ իսկապէս վտանգաւոր իրավիճակ` նոր մենաշնորհային իշխանութեան ձեւաւորման համար։ Չեմ կարծում, որ իշխանական մի մենաշնորհի անցումը միւս մենաշնորհին կարող է երկրի համար օգտակար լինել։ Ի վերջոյ, թաւշեայ յեղափոխութեան ողջ իմաստը քաղաքական մենաշնորհը կազմաքանդելու մէջ էր։

Ես համարեցի, որ այդ իրավիճակում պէտք է ձայն բարձրացնել, պէտք է խօսել սեփական հայացքների մասին, պէտք է փորձել օգնել այն գործընթացին, որը դիմակայում է նոր քաղաքական մենաշնորհի ձեւաւորմանը։

 

- Արդեօ՞ք դա նշանակում է, որ Ձեր նպատակն ակտիւ քաղաքականութիւն վերադառնալն է՝ ինչ-որ պաշտօն զբաղեցնելը, գուցէ խորհրդարանում, գուցէ որպէս վարչապետ, կամ լինել ընդդիմադիր առաջնորդ՝ քաղաքական համակարգում որոշ հաւասարակշռութիւն ապահովելու համար։ 

- Ես ցանկանում եմ օգնել այդ հաւասարակշռութեան ակտիւ ձեւաւորմանը։

 

- Ինչպէ՞ս։

- Դառնալ դրա մասնակիցը, առաջին հերթին՝ տեսակէտներ արտայայտելով, երկրորդ՝ ակտիւ փոխգործակցութեամբ այլ քաղաքական ուժերի հետ, օգտագործելով ամբողջ այն գործիքակազմը, որով, սովորաբար, մասնակցում են քաղաքական գործընթացներին։ Դա կարող է լինել եւ անձնական մասնակցութիւն, կարող է լինել համագործակցութիւն, կարող է լինել պարզապէս ակտիւ դիրքորոշում Հայաստանի քաղաքական հարթակում, դիրքորոշում՝ հասարակութեանը մտահոգող հարցերի եւ ընդհանուր իրավիճակի վերաբերեալ։ Այսինքն՝ այստեղ բաւականին լայն շրջանակ է։ Ամենակարեւորն ինձ համար այն էր, որ չի կարելի հեռու մնալ տեղի ունեցող իրադարձութիւններից։ Ինչ-որ պաշտօն զբաղեցնելը երբեք ինձ համար ինքնանպատակ չի եղել։ Ես անցել եմ ամենաբարձր պաշտօններով, որոնց մասին ցանկացած քաղաքական գործիչ կարող է երազել։ Եւ այս դէպքում դա ինձ համար ինչ-որ նոր, այսպէս ասած՝ չտեսնւած բան չէ, որին ձգտելու ուժգին ցանկութիւն լինի։

 

- Արդեօ՞ք ինչ-որ անձնական զգացումներ ունէք պարոն Փաշինեանի հանդէպ։

- Պատկերացրէք՝ ես նրա հետ անգամ ծանօթ չեմ։ Ես նրա հետ երբեք չեմ հանդիպել, անձնապէս նրան չեմ ճանաչում։ Հնարաւոր է՝ նա եղել է ինչ-որ մամուլի ասուլիսների, բայց անգամ չեմ յիշում: Անձնական շփում մենք երբեք չենք ունեցել։

 

- Իսկ երբեք չէ՞ք փորձել նրա հետ կապ հաստատել։

- Ոչ, երբեք։

 

- Նոյնիսկ հիմա՞։

- Երբեք, այդ թւում՝ հիմա։

 

- Նա չի՞ փորձել կապւել Ձեզ հետ։

- Ես կարծում եմ՝ նրա մօտ ստեղծւել է անձնական ատելութիւն իմ անձի հանդէպ, եւ այդ ատելութիւնն այժմ արտայայտւում է տարբեր պետական ինստիտուտների գործունէութեան մէջ, առաջին հերթին՝ իրաւապահ մարմինների։

 

- Ի՞նչ էք կարծում, այս ամէնը ընդհանրապէս եւ Ձեզ համար մասնաւորապէս ի՞նչ հանգուցալուծում կունենայ:

- Բոլոր քաղաքագէտները, վերլուծաբանները հասկանում են, որ գործող վարչապետը բաւականին համոզիչ յաղթանակ կը տանի (դեկտեմբերեան ընտրութիւններում- խմբ.), եւ ամենայն հաւանականութեամբ, կը ձեւաւորւի միակուսակցական խորհրդարան՝ առանց արժանի կերպով ներկայացւած ընդդիմութեան։ Դա կը նշանակի, որ Հայաստանի պետականութիւնը մեծ խնդիրներ ունի։ Ի դէպ, մեր ամենամեծ յաջողութիւնները եղել են հէնց այն ժամանակ, երբ խորհրդարանում կար խելամիտ տարանջատում, այսինքն՝ ոչ մի կուսակցութիւն չունէր խորհրդարանական մեծամասնութիւն, երբ ձեւաւորւել էին կոալիցիաներ, երբ բոլոր հարցերը քննարկւում էին այդ կոալիցիայի շրջանակում։ Խոհրդարանում միակուսակցական գերակշռութեան բոլոր դէպքերը Հայաստանի համար ցաւալի աւարտ են ունեցել, եւ, ի դէպ, այն իշխանութեան փոփոխութեամբ, որը գերակշռում էր խորհրդարանում։ Այդպիսին էր 90-ականների սկզբին, այդպիսին էր իրավիճակը վերջին տարիներին՝ թաւշեայ յեղափոխութիւնից առաջ։ Դրա համար էլ, կրկնում եմ, դեկտեմբերին ընտրութիւնները կը լինեն Փաշինեանի անձնական տակտիկական յաղթանակը, բայց պարտութիւն մեր պետականութեան համար:

Ինչ վերաբերում է այն հարցին, թէ ինչպէ՞ս կաւարտւի իմ պատմութիւնը։ Չէի ուզենայ գուշակութիւններ անել: Գիտէ՞ք, այսպիսի քաղաքական գերակշռութեան պայմաններում, որը կարող է ձեւաւորւել, չեմ կարող գործնականում կանխատեսել երկրի դատական համակարգի վրայ իշխանութեան ճնշման աստիճանը: Սա աննորմալ իրավիճակ է: Ասեմ նաեւ քրէական գործի մասով. ինչպէս ասաց իմ փաստաբաններից մէկը, այդ քրէական գործի ամենամեծ քննչական գաղտնիքը գործում անհեթեթութիւնների աներեւակայելի թւաքանակն է: Դա պարզապէս իրաւական աղբ է, եւ ես չեմ կասկածում, որ կոնկրետ այդ գործը պարզապէս հեռանկար չունի Մարդու իրաւունքների եւրոպական դատարանում։ Ես յոյս ունեմ, որ Հայաստանի դատական համակարգում, չնայած գոյութիւն ունեցող ճնշմանը, ամէն դէպքում, կարող է արդարացի որոշում լինել:

 

- Ձեր կարծիքով՝ ինչո՞ւ մարդիկ շատ հակասական կարծիք ունեն Ձեր մասին։ Շատ մարդիկ ատում են Ձեզ, իսկ շատերը՝ յարգում։ Ինչո՞ւ կայ այսպիսի խիստ տարանջատում։ Չկայ մէկը, ով անտարբեր է։

- Ես երբեք չեմ փորձել հաճելի լինել մարդկանց, երբեք պոպուլիզմով չեմ զբաղւել։ Մեր քաղաքացիներն էմոցիոնալ են, նրանք սիրում են, որ ղեկավարը եւս էմոցիոնալ լինի, մշտապէս հաճելի բաներ ասի, ցոյց տայ իր զգացմունքայնութիւնը։

Խառնւածքով ես այլ եմ, շատ կոնկրետ եմ կառավարման մէջ, մի քիչ չոր, սակայն, ինչպէս ցոյց են տւել իմ նախագահութեան տարիները, որոշումներ կայացնելու, իրագործելու, հետեւողական լինելու հարցում՝ արդիւնաւէտ։ Ճգնաժամային իրավիճակներում ինձ միշտ յաջողւել է գտնել ճիշտ ելքեր: Բացատրութիւնը, կարծում եմ, հէնց այստեղ է։ Մարդիկ չեն հերքում, որ իմ նախագահութեան տարիներին սկսել են շատ աւելի լաւ ապրել: Սակայն, կրկնում եմ, ես երբեք քայլեր չեմ արել, որպէսզի պաշտելի լինեմ։ Եւ չեմ կարծում, որ դա պարտադիր բաղադրիչ է յաջողակ պետական գործչի համար:

Հարցազրոյցը վարեց Թոնի Հալփինը

Յարակից լուրեր

Ամենաշատ ընթերցւած

Քւէարկութիւն

Կը յաջողւի՞ արդեօք Արմէն Սարգսեանին նոր որակ մտցնել ՀՀ քաղաքական կեանքում:

Եղանակ

Հեղինակություն © 2011-2017 «ԱԼԻՔ» Օրաթերթ։ Բոլոր իրավունքները պահպանված են։