Հա

Քաղաքական

07/09/2019 - 10:00

«Հնարաւոր է՝ նրանց ռազմական ներուժն են ուզում օգտագործել ՀՀ նախկին իշխանութիւնների կամ Արցախի իշխանութիւնների դէմ». Ստեփան Դանիէլեանը՝ Փաշինեան-«Սասնայ ծռեր» համագործակցութեան մասին

Քաղաքագէտ Ստեփան Դանիէլեանը ՀՀ վարչապետ Նիկոլ Փաշինեան-«Սասնայ Ծռեր» հանդիպումը վերլուծելիս կարեւոր է համարում յստակ ինֆորմացիայի վրայ հիմնւելը։

«alikonline.ir» - Քաղաքագէտ Ստեփան Դանիէլեանը ՀՀ վարչապետ Նիկոլ Փաշինեան-«Սասնայ Ծռեր» հանդիպումը վերլուծելիս կարեւոր է համարում յստակ ինֆորմացիայի վրայ հիմնւելը։ Նա Tert.am-ի զրոյցում նկատեց, որ հանդիպումից յետոյ եղել է «Սասնայ ծռեր» կուսակցութեան ղեկավար Ժիրայր Սեֆիլեանի յայտարարութիւնը, թէ նախկին ուժերը ռեւանշի են պատրաստւում, իրենք դա թոյլ չեն տայ։ Ստեփան Դանիէլեանը շեշտեց, որ վարչապետ Փաշինեանը կամ նրա մամուլի ծառայութիւնը չեն հերքել Սեֆիլեանի յայտարարութիւնը։

«Պէտք է փորձենք եզրակացութիւն անել, թէ ինչպէ՞ս թոյլ չեն տալու, ի՞նչ գործողութիւններ են անելու «Սասնայ ծռեր»-ը, որ ՀՀ-ում իշխանափոխութիւնը չլինի։ Ընտրութիւնները ցոյց տւեցին, որ նրանց հաւաքած ձայների տոկոսը շատ փոքր է, հանրային խօսքի կամ հանրութեան վրայ քաղաքական գործունէութեամբ ազդելու հնարաւորութիւնները բաւականին սահմանափակ են, նրանք ՀՀԿ-ից մի քանի անգամ աւելի քիչ ձայն են հաւաքել»,- նկատեց Ստեփան Դանիէլեանը։

Ի՞նչ է անելու «Սասնայ ծռեր» կուսակցութիւնը հարցին ի պատասխան՝ Դանիէլեանը յայտնեց իր ենթադրութիւնը, որ դա լինելու է զինւած պաշտպանութեան տեսքով։ Նա չբացառեց, որ գործող իշխանութիւնը ֆորմալ իրաւական համակարգի պաշտպանութեանը կա՛մ չի վստահում, կա՛մ կարողութիւնները բաւարար չի համարում։

«Միգուցէ իշխանութիւնը ստիպւած է ոչ ֆորմալ խմբաւորման աջակցութիւնը ստանալ։ Սա միակ գնահատականն է, որ առաջին հայեացքից միտքս է գալիս, քանի որ այլ բացատրութիւն այս պահին չկայ։ Հանդիպումից կարող են տարբեր կարծիքներ լինել, բայց հիմնաւորւած կարծիքը յենւում է Ժիրայր Սեֆիլեանի յայտարարութեան վրայ, որը գործող իշխանութիւնը չի մերժել։ Ըստ էութեան՝ սա նշանակում է ոչ քաղաքական եղանակներով մտնել քաղաքական պայքարի մէջ եւ դաշինք կազմել, քանի որ «Սասնայ Ծռեր»-ը զինւած խմբաւորում է, որը ռազմատենչ յայտարարութիւններ է արել նաեւ Արցախի իշխանութիւնների դէմ»,- նշեց քաղաքագէտը։

Ստեփան Դանիէլեանը ենթադրում է, որ Փաշինեան-«Սասնայ ծռեր» հատման կէտն այն է, որ «Սասնայ ծռեր»-ի զինւած գործողութիւններով զսպեն Արցախի իշխանութիւններին կամ նոյն ռազմական եղանակով պայքար մղեն նախկին իշխանութիւնների դէմ:

«Այլ ենթադրութիւն հնարաւոր չէ անել, քանի որ ընտրութիւնները ցոյց տւեցին, որ նրանք քիչ ընտրազանգւած ունեն։ Նրանք պետութեան մէջ ռազմական կառոյց են»,- շարունակեց Ստեփան Դանիէլեանը։

Հարցին՝ Նիկոլ Փաշինեանն իշխանութեան կորստի վտա՞նգ է տեսնում, Դանիէլեանը պատասխանեց․ «Այս եզրակացութեանը գալիս ենք Սեֆիլեանի յայտարարութիւնից, որը չեն հերքել իշխանութիւնները»։

Յարակից լուրեր

Հեղինակություն © 2011-2017 «ԱԼԻՔ» Օրաթերթ։ Բոլոր իրավունքները պահպանված են։