Հա

Համայնք

05/01/2020 - 09:30

Եկեղեցական արարողութեամբ ու տօնախմբութեամբ նորջուղայեցիները դիմաւորեցին 2020 թւականը

2020 թւականի Ամանորի առթիւ, յունւարի 1-ի առաջին պահերին՝ ժամը 00:30-ին, Ս. Ամենափրկիչ վանքի Ս. Յովսէփ Արիմաթացի եկեղեցում, Գոհաբանական աղօթք մատուցւեց՝ Սպահանի հայոց թեմի առաջնորդ գերշ. Տ. Սիփան եպս. Քէչէճեանի նախագահութեամբ եւ եկեղեցական դասի մասնակցութեամբ:

«alikonline.ir» - 2020 թւականի Ամանորի առթիւ, յունւարի 1-ի առաջին պահերին՝ ժամը 00:30-ին, Ս. Ամենափրկիչ վանքի Ս. Յովսէփ Արիմաթացի եկեղեցում, Գոհաբանական աղօթք մատուցւեց՝ Սպահանի հայոց թեմի առաջնորդ գերշ. Տ. Սիփան եպս. Քէչէճեանի նախագահութեամբ եւ եկեղեցական դասի մասնակցութեամբ: Տեղեկացնում է Նոր Ջուղայի մեր թղթակիցը:

Արարողութեան աւարտին առաջնորդ Սրբազան Հայրը, իր, հոգեւորականաց դասի եւ ազգային իշխանութեան անունից շնորհաւորանքի խօսք հնչեցնելով տօնի առթիւ, մաղթեց, որ 2020 թւականին աշխարհում տիրի համերաշխութիւն, փոխզիջում եւ փոխհասկացողութիւն։

Այնուհետեւ վանքի շրջափակում տեղի ունեցաւ տօնախմբութիւն՝ հրավառութեամբ, տօնական երգ-երաժշտութեամբ եւ հիւրասիրութեամբ յագեցած ծրագրով։

Յունւարի 1-ի առաւօտեան, Սուրբ եւ Անմահ Պատարագ մատուցւեց դարձեալ Ս. Յովսէփ Արիմաթացի եկեղեցում: Օրւայ պատարագիչն էր գերշ. Տ. Սիփան եպս. Քէչէճեանը։ Պատարագին մասնակցում էր եկեղեցական դասը, իսկ երգեցողութեամբ հանդէս եկաւ Ս. Ամենափրկիչ վանքի «Կոմիտաս» երգչախումբը՝ դոկտ. Արբի Բաբումեանի ղեկավարութեամբ։

Ընթացքում ներկաներին իր Ամանորեայ պատգամը փոխանցեց պատարագիչը՝ որտեղ անդրադառնալով 2019 թւականին՝ որպէս Մեծի Տանն Կիլիկիոյ կաթողիկոս Ն.Ս.Օ.Տ.Տ. Արամ Ա Վեհափառ Հայրապետի կողմից հռչակւած Հայ մամուլի տարի, հարց ուղղեց, թէ իւրաքանչիւրն իր կարողութիւնների սահմաններում ինչքանո՞վ է յաջողել նիւթապէս եւ բարոյապէս նեցուկ հանդիսանալ հայ մամուլին։ Սրբազան Հայրն իր խօսքի մի այլ բաժնում կոչ արեց. «Որպէս մարդ երբեք չմտահոգւենք, թէ ինչ պէտք է կատարենք, որպէսզի մեր անուններն ու նկարները տեղադրւած գտնենք հայ եւ օտար թերթերի կամ մամուլի մէջ, այլ որպէս քրիստոնեաներ մտահոգւենք, թէ ինչպիսի աստւածապաշտութեամբ ու բարեգործութիւններով ենք արժանանալու սուրբերի այն վիճակին, որով կը կարողանանք մեր անուններն արձանագրւած տեսնել երկնքի արքայութեան կեանքի գրքի մէջ»։

Այնուհետեւ ներկաներն տարւայ առաջին Ս. Հաղորդութիւնն ստացան Սրբազան Հօր միջոցով, իսկ արարողութեան աւարտին Ս. Ամենափրկիչ վանքի «Ծաղկեայ դահլիճ»-ում գերշ. Տ. Սիփան եպս. Քէչէճեանն ընդունեց Ամանորեայ շնորհաւորանքներն ու բարեմաղթանքները։

Արարողութիւններին ու տօնախմբութեանը ներկայ էին՝ ազգային մարմինների անդամներն ու բազմահարիւր հայորդիներ՝ Նոր Ջուղայի եւ Շահինշահրի հայ համայնքներից։

Յարակից լուրեր

Ամենաշատ ընթերցւած

Քւէարկութիւն

Կը յաջողւի՞ արդեօք Արմէն Սարգսեանին նոր որակ մտցնել ՀՀ քաղաքական կեանքում:

Եղանակ

Հեղինակություն © 2011-2017 «ԱԼԻՔ» Օրաթերթ։ Բոլոր իրավունքները պահպանված են։