Հա

Ազգային

09/11/2019 - 09:05

«Արայիկ Յարութիւնեանը «Տրոյական ձի» է». ՀՅԴ Հայաստանի ԳՄ անդամները հանդէս են եկել մամուլի ասուլիսով

Երէկ՝ նոյեմբերի 8-ին, ՀՅԴ Հայաստանի Գերագոյն մարմնի անդամներ Արծւիկ Մինասեանը, Տարօն Տօնոյեանը եւ Աշոտ Սիմոնեանը հանդէս են եկել մամուլի ասուլիսով՝ անդրադառնում են ՀՀ քաղաքական վերջին զարգացումներին եւ ՀՀ կրթութեան, գիտութեան, մշակոյթի եւ սպորտի (ԿԳՄՍ) նախարար Արայիկ Յարութիւնեանի վերջին յայտարարութիւններին:

«alikonline.ir» - Երէկ՝ նոյեմբերի 8-ին, ՀՅԴ Հայաստանի Գերագոյն մարմնի անդամներ Արծւիկ Մինասեանը, Տարօն Տօնոյեանը եւ Աշոտ Սիմոնեանը հանդէս են եկել մամուլի ասուլիսով՝ անդրադառնում են ՀՀ քաղաքական վերջին զարգացումներին եւ ՀՀ կրթութեան, գիտութեան, մշակոյթի եւ սպորտի (ԿԳՄՍ) նախարար Արայիկ Յարութիւնեանի վերջին յայտարարութիւններին: Հաղորդում է Yerkir.am-ը:

Ասուլիսի ընթացքում, Արծւիկ Մինասնեանն անդրադառնալով Արայիկ Յարութիւնեանի՝ որպէս նախարար վարքագծին, ասել է. «Պարզւում է՝ Արայիկ Յարութիւնեանը ոչ այլ ոք է, քան պարզապէս «Տրոյական ձի»՝ Հայաստանի համար, որ ներդրւած է, եւ որի նպատակն է պարզապէս քանդել Հայաստանի, հայ ժողովրդի ազգային ինքնատիպութիւնը»:

ՀՅԴ ԳՄ անդամն անդրադարձել է նաեւ քրէական գործերով ցուցարար երիտասարդների բերած արկղերը լցնելու մասին ԿԳՄՍ նախարարի սպառնալիքին, նշելով, որ բազմաթիւ անիմաստ քրէական գործեր յարուցելու եւ ՀՀ իրաւական համակարգը ծանրաբեռնելու փոխարէն՝ 2 յօդւած կայ, որով Արայիկ Յարութիւնեանը պէտք է պատասխանատւութեան ենթարկւի՝ սուտ մատնութեան կամ յանցագործութիւնը պարտակելու յոդւածներով;

«ՀՅԴ-ն 3 ուղղութեամբ էլ պատրաստ է՝ բանավէճի պատրաստ ենք, քրէականով պէտք է ինքը գործը անի, հակառակ դէպքում իր նկատմամբ պէտք է յարուցւի քրէական գործ եւ, ի վերջոյ, կրթական քաղաքականութեան մէջ՝ ի՞նչ է արել, բացի այս արատաւոր գործողութիւններից՝ ուսուցչի արժանապատւութիւնն է վիրաւորում՝ «դուք անգլերէն չգիտէք»՝ սա՞ է Կրթութեան նախարարի դաստիարակութիւնը»,-ընդգծեց Արծվիկ Մինասեանը։

Նա յիշեցրեց, որ ԿԳ նախկին նախարար, ՀՅԴ անդամ Լեւոն Մկրտչեանը եւս յայտարարել էր հրապարակային բանավէճի պատրաստակամութեան մասին․ «Եթէ Արայիկ Յարութիւնեանն այդքան վստահ է իր ուժերին, թող բանավիճի»։

Արծւիկ Մինասեանը յիշեց ֆիլմի յայտնի արտայայտութիւնը՝ «Իսկ ո՞վ էր Արայիկ Յարութիւնեանը մինչեւ յեղափոխութիւնը, ո՞ւմ ֆինանասաւորմամբ է կրթութիւն ստացել»։

Ըստ նրա, Արայիկ Յարութիւնեանի հրաժարականի պահանջով շարժումը բերելու է համազգային պայքարի. «ՀՀ իշխանութիւնը օր առաջ գործողութիւններ պէտք է ձեռնարկի, հակառակ դէպքում՝ ազգային մտածելակերպ ունեցող, սեփական ազգի արժանապատւութիւնը հարգող մարդիկ իրենց ուղղակի կը քշեն»,- ասաց նա։

ՀՅԴ ՀԵՄ նախաձեռնած՝ Արայիկ Յարութիւնեանի հրաժարականի պահանջով նստացոյցին լրագրողներից մէկը քաղաքական այլ ուժի ներկայացուցչի էր նկատել․ Արծւիկ Մինասեանն ասաց՝ անկախ քաղաքական կողմնորոշումից՝ ազգային արժէքներ կրող անձինք, մտաւորականները,  ԵՊՀ տարբեր ֆակուլտետների ուսանողները․․․ շատերն են մասնակցում ՀՅԴ ՀԵՄ-ի նախաձեռնած շարժմանը, բայց դա չի նշանակում՝ ով խօսում է ազգայինի մասին, դաշնակցական է։

«Եթէ այդ մտածողութիւնն է, մենք միայն ուրախ կը լինենք։ Բայց իմացէք՝ այդ մարդկանց թիւը չափազանց շատ է, որոնք ազգային մտածողութիւնը կարեւորում են, բայց դաշնակցական չեն»,- յաւելեց Արծւիկ Մինասեանը։

Նա անթոյլատրելի համարեց սեպարատիստական եւ կուսակցական մօտեցումները՝ ընդգծելով, որ ընդվզողները միայն դաշնակցական երիտասարդները չեն եւ յստակ է՝ սա հայ ինքնութեան պաշտպանութեան հարցն է։

«Եթէ Նիկոլ Փաշինեանը պաշտպանում է Արայիկ Յարութիւնեանի՝ ազգային արժէքները ոտնահարող այս վարքագիծը, նոյն գնահատականները իր հասցէին կը հնչեցնենք։ Բայց այս պահի դրութեամբ մենք ակնկալում ենք գոնէ ողջամտութիւն, որ անձը, որը յայտնի է նաեւ իր նախորդ գործունէութեամբ՝ ապազգային պահւածքը քաջալերելու եւ, նաեւ ապազգային մերժւած ուժին աջակցելու, այդ անձը չի կարող ուղղակի շարունակել իր գործունէութիւնը որպէս Հայաստանը ներկայացնող եւ այն էլ ոչ աւել, ոչ պակաս՝ Կրթութեան, գիտութեան, մշակոյթի եւ սպորտի նախարարի պաշտօնում»,- ընգծեց Արծւիկ Մինասեանը։

Նա յիշեցրեց նախարարի՝ ընդհանրապէս հայերէն արտայայտւելու ձեւը, որը լեզւի ամրապնդման հարցով քաղաքականութիւն իրականացնող պատասխանատուին վայել չէ եւ հետեւութիւն արեց, որ նախարարը հակաօրինական ընթացքի մէջ է։

Արծւիկ Մինասեանը վստահեցրեց,որ ՀՅԴ ԳՄ-ն շարժում սկսելու որոշում չի կայացրել՝ իրենց օգնութիւնն այն է եղել, որ չեն խանգարել, հակառակ որոշում չեն կայացրել, որովհետեւ դա կուսակցութեան արժեհամակարգին համընթաց պայքար է։

Իսկ Արայիկ Յարութիւնեանը եւ միւսները, որոնք սա չեն պատկերացնում, ըստ Արծւիկ Մինասեանի՝ պատճառն այն է, որ չեն հասկանում՝ ինչ բան է գաղափարաբարոյական կենտրոնացումը եւ կազմակերպական ապակենտրոնութիւնը․ «Ուղղակի չեն պատկերացնում՝ ո՞նց կարող է կուսակացութիւն լինել, որը գաղափարաբար միասնական է, կազմակերպական՝ ըստ տւեալ ոլորտի՝ ինքնուրույնութիւն ունի․ դրանից ելնելով են շփոթմունքի մէջ»։

Նա ընդգծեց՝ Դաշնակցութիւնը ցանկացած այնպիսի տեղում է, որտեղ կայ ազգայինը պաշտպանելու խնդիր՝ լինի ռազմի դաշտում, թէ քաղաքացիական կեանքում։

Տարօն Տօնոյեանն էլ իր հերթին անդրադառնալով Արայիկ Յարութիւնեանի՝ դաշնակցական երիտասարդների «անդաստիարակութեան» մասին նրա յայտարարութեանը, յիշեցերել է, որ այսօր նստացոյց անող երիտասարդները ապրիլյեան պատերազմի ժամանակ առաջին իսկ արձագանքողներն են եղել եւ յայտնւել են Թալիշի առաջնագիծ դիրքերում, ոչ թէ երկրորդ «ռուբեժի» խրամատներ են փորել. «Սա՛ է մեր դաստիարակութիւնը»,- ընդգծել է նա՝ յաւելելով. «Մեզ համար անընդունելի է այն դաստիարակութիւնը, որ պէտք է Մայր աթոռի վեհարանը գրաւեն, բռնազաւթեն եւ վրան խփեն այնտեղ․ մեզ համար անդաստիարակ են ա՛յդ մարդիկ: Մեզ համար անդաստիարակ են ա՛յն մարդիկ, ովքեր դատարաններն են շրջափակում»:

Աշոտ Սիմոնեանն էլ իր հերթին ասել է. «Ես պարոն Յարութիւնեանին վստահաբար կարող եմ ասել հետեւեալը. եթէ մեր սփիւռքի կառոյցի ղեկավարները գան Հայաստան եւ աւելի մօտիկից ծանօթանան այն ապազգային գործելաոճին, որը պարոն Յարությունեանը փորձում է իրականացնել կրթութեան ոլորտում, վստահաբար կը յորդորեն Հայաստանի կառոյցի դաշնակցականներին՝ աւելի վճռական լինել, իրենց գործողութիւններում աւելի արմատական լինել եւ օր առաջ պարոն Յարութիւնեանին եւ նման մտածելակերպ ունեցող անձանց դուրս մղել քաղաքականութիւնից՝ առհասարակ պետական կառավարման համակարգից»:

Յարակից լուրեր

Հեղինակություն © 2011-2017 «ԱԼԻՔ» Օրաթերթ։ Բոլոր իրավունքները պահպանված են։