Հա

Քաղաքական

16/02/2020 - 10:00

Կանխահաս մեծ մարտահրաւէր եւ սպասուող դժուար որոշում

Լիբանանեան խորհրդարանը չորեքշաբթի, 12 փետրուարին գումարեց կառավարութեան աշխատանքային ծրագիրի քննարկման իր լիագումար նիստը, որուն աւարտին չքացաւ 29 հոկտեմբերէն` նախորդ գործադիր իշխանութեան հրաժարականէն ի վեր, երկրին մէջ ստեղծուած վնասաբեր քաղաքական բացը: Արդարեւ, կառավարութեան նկատմամբ վստահութեան քուէարկութեան նիստին ներկայ 84 երեսփոխաններէն 63-ը կառավարութեան նկատմամբ վստահութեան հարցով «այո՛» քուէարկեցին, 20-ը` «ո՛չ», իսկ մէկ երեսփոխան մնաց ձեռնպահ:

ՎԱՀՐԱՄ ԷՄՄԻԵԱՆ

 

Լիբանանեան խորհրդարանը չորեքշաբթի, 12 փետրուարին գումարեց կառավարութեան աշխատանքային ծրագիրի քննարկման իր լիագումար նիստը, որուն աւարտին չքացաւ 29 հոկտեմբերէն` նախորդ գործադիր իշխանութեան հրաժարականէն ի վեր, երկրին մէջ ստեղծուած վնասաբեր քաղաքական բացը: Արդարեւ, կառավարութեան նկատմամբ վստահութեան քուէարկութեան նիստին ներկայ 84 երեսփոխաններէն 63-ը կառավարութեան նկատմամբ վստահութեան հարցով «այո՛» քուէարկեցին, 20-ը` «ո՛չ», իսկ մէկ երեսփոխան մնաց ձեռնպահ:

Լիբանանին ազգային միասնականութեան կառավարութիւնները բնականաբար աւելի բարձր քուէներ ստացած էին, սակայն Հասսան Տիապի կառավարութիւնը մեծամասնական կառավարութիւն մըն է եւ ոչ թէ ազգային միասնականութեան, եւ իբրեւ այդպիսին աւելի քուէ ապահոված է, քան իր երկու նմանները` Օմար Քարամէի 2004 թուականի կառավարութիւնը, սակայն նուազ քան Նաժիպ Միքաթիի 2011-ի կառավարութիւնը (որուն անդամ էր վարչապետ Տիապ), որոնք յաջորդաբար ապահոված էին նիստին ներկայ 118 երեսփոխաններէն 59-ին եւ 69 երեսփոխաններէն 68-ին քուէները: Այստեղ պէտք չէ մոռնալ նաեւ այն հանգամանքը, որ, ըստ օրէնքի, կառավարութիւն մը խորհրդարանին մէջ վստահութեան քուէն ապահոված կ՛ըլլայ, եթէ «այո՛» քուէարկող երեսփոխաններուն թիւը «ո՛չ» քուէարկողներէն մէկ քուէով աւելի է:

Խորհրդարանին վստահութիւնը ստանալէ ետք, կառավարութիւնը այժմ պէտք է աշխատի ստանալու ժողովուրդին վստահութիւնը` կասեցնելով մսխումը, պայքարելով փտածութեան դէմ եւ վերադասաւորելով Լիբանանի պարտքերը: Ուստի անոր պէտք է առիթ տրուի գործելու:

Ընդունուած կարգ է, որ բնական պայմաններու մէջ կազմուած կառավարութիւններուն կը տրուի 100 օրուան պայմանաժամ մը: Ներկայ նախարարաց խորհուրդը արտակարգ ու ծանր տագնապի պայմաններու մէջ կազմուած կառավարութիւն մըն է, որուն թերեւս, տրամաբանականօրէն ու արդարօրէն, առաւել երկար ժամանակ պէտք է տրուի, սակայն առարկայական պայմանները այդ մէկը չեն թոյլատրեր:

Փոխան երեք ամսուան պայմանաժամի, Լիբանանի նորակազմ կառավարութիւնը իր դիմաց ունի երեք շաբթուան պայմանաժամ մը, որովհետեւ շուտով ինքզինք պիտի գտնէ մեծ մարտահրաւէրի մը դիմաց. լիբանանեան պետութիւնը ստիպուած է 9 մարտին մարել 2020-ին վճարուելիք «Եուրոպոնտի»-ի 2,5 միլիառ տոլարի հասնող պարտքին առաջին բաժինը, որ 1,2 միլիառ տոլար է:

Վարչապետ Տիապի գլխաւորած կառավարութեան այս թէ այլ հարցերով կը սպասեն դժուար ու քաջ որոշումներ, որոնք կրնան երկիրն ու անոր ժողովուրդը նուազագոյն վնասներով դուրս բերել իր ներկայ ծանր պայմաններէն:

 

«Ազդակ»

Յարակից լուրեր

  • Խմբագրական. Լիբանանահայութիւնը եւ համայնաքային ցանցային կառոյցը
    Խմբագրական. Լիբանանահայութիւնը եւ համայնաքային ցանցային կառոյցը

    Կազմակերպուածութեան աստիճանաչափի նոր գրանցում կատարեց լիբանանահայութիւնը, երբ աշխարհը հարուածած «Քորոնա» ժահրի բռնկման սկզբնական փուլին իսկ անյապաղ յառաջացուց Ճգնաժամային շտապը` գործադաշտին ներառելով յարանուանութիւնները, կուսակցութիւնները, միութիւնները: Նպատակը` հասնիլ ժողովուրդի կարիքներուն:

  • Անդրադարձ. «Քորոնա»-ի տնտեսական արդիւնքը
    Անդրադարձ. «Քորոնա»-ի տնտեսական արդիւնքը

    Աշխարհի համաշխարհայնացուած ներկայ համակարգը մեծապէս նպաստեց այս ժահրի տարածումին, մանաւանդ Եւրոպայի մէջ, ուր «անտեսանելի թշնամի»-ին տարածման կշռոյթը շատ արագ է, իսկ մահերուն ու վարակուածներուն թիւը` բարձր:

  • «Լիբանանում կորոնավիրուսով մահացած 6-րդ մարդն ազգութեամբ հայ է». MTV
    «Լիբանանում կորոնավիրուսով մահացած 6-րդ մարդն ազգութեամբ հայ է». MTV

    Արաբական MTV-ի փոխանցմամբ՝ Լիբանանում կորոնավիրուսից մահացած վեցերորդ մարդը ազգութեամբ հայ է:

  • Նկատումներ ինքնամեկուսացնող ժահրի մասին
    Նկատումներ ինքնամեկուսացնող ժահրի մասին

    Աշխարհի համաշխարհայնացուած ներկայ համակարգը մեծապէս նպաստեց այդ ժահրին տարածումին, մանաւանդ Եւրոպայի մէջ, ուր «անտեսանելի թշնամի»-ին տարածման կշռոյթը շատ արագ է: Արդարեւ, բաց սահմաններու եւ արագ հաղորդակցութեան բարիքը վերածուեցաւ չարիքի. ժահրը անարգել ու դիւրութեամբ տարածուեցաւ, ուստի բոլոր երկիրներն ալ դիմեցին իրենց սահմաններու փակման` ինքնամեկուսացման: 

  • «Քորոնա»-ի դէմ. Անհատական ճիգով բոլորս կը յաղթենք
    «Քորոնա»-ի դէմ. Անհատական ճիգով բոլորս կը յաղթենք

     

    «Քորոնա» ժահրի երեւումն ու արագասոյր տարածումը քանդեց պետական սահմանները եւ աշխարհով մէկ վերածուեցաւ հասարակաց թշնամիի:

Ամենաշատ ընթերցւած

Քւէարկութիւն

Կը յաջողւի՞ արդեօք Արմէն Սարգսեանին նոր որակ մտցնել ՀՀ քաղաքական կեանքում:

Եղանակ

Հեղինակություն © 2011-2017 «ԱԼԻՔ» Օրաթերթ։ Բոլոր իրավունքները պահպանված են։