Հա

Քաղաքական

13/01/2020 - 14:40

«Ինքնաթիռի կործանման վերաբերեալ դիրքորոշումները պայմանաւորւած էին անտեղեակութեամբ». Կառավարութեան խօսնակ

Կառավարութեան խօսնակ Ալի Ռաբիին այսօր՝ յունւարի 13-ին, լրագրողների հետ հանդիպման ժամանակ անդրադարձել է ուկրայինական ինքնաթիռի աղէտին՝ նշելով, որ դէպքի պատճառների հետ կապւած նախնական դիրքորոշումները պայմանաւորւած էին անտեղեակութեամբ:

«alikonline.ir» - Կառավարութեան խօսնակ Ալի Ռաբիին այսօր՝ յունւարի 13-ին, լրագրողների հետ հանդիպման ժամանակ անդրադարձել է ուկրայինական ինքնաթիռի աղէտին՝ նշելով, որ դէպքի պատճառների հետ կապւած նախնական դիրքորոշումները պայմանաւորւած էին անտեղեակութեամբ. տեղեկացնում է ԻՌՆԱ-ն:

Նշելով, որ նախորդ օրերի ընթացքում, դէպքի հետ կապւած բազմաթիւ քննադատութիւններ են հնչել երկրի ղեկավարութեան հասցէին, Ռաբիին ասել է. «Մեզ մեղադրում են ստելու, եւ իրականութիւնը թաքցնելու մէջ, մինչդեռ այդպէս չէ: Անգամ հինգշաբթի երեկոյեան իմ հրապարակած յայտարարութիւնն այդպէս է ընկալւել, բայց ճշմարտութիւնն այն է, որ մենք չենք ստել: Սուտը նշանակում է իրականութեան կանխամտածւած եւ միտումնաւոր խեղաթիւրում: Սա երբեք մեր կողմից չի պատահել:

Բոլոր նրանք, ովքեր այդ օրերին՝ Իրանի դէմ ԱՄՆ հոգեբանական պատերազմի ամենաթէժ պահերին յայտարարութիւն կատարեցին, հիմնւած էին ազգային ինքնասիրութեան վրայ, եւ ապաւինել էին առկայ տեղեկութիւններին: Բոլոր յայտարարութիւնները հիմնւած էին այդ պահի դրութեամբ առկայ տեղեկութիւնների, աւելի ստոյգ՝ անտեղեակութեան, կամ աւելի ճիշտ՝ տեղեակ չպահւելու վրայ»:

Կառավարութեան խօսնակը նշել է, որ դէպքի առաջին իսկ պահից նախագահը շեշտել է, որ անհրաժեշտ է դրա մասին ամբողջական տեղեկատւութիւն տրամադրւի հանրութեանը:

Նա ներողութիւն է խնդրել Իրանի ժողովրդից, հանրային կարծիքից եւ լրագրողներից՝ շեշտելով, որ կառավարութիւնը նոյնպէս թերի տեղեկացւածութեան զոհ է դարձել:

«Ոմանք քննադատում են ինձ, թէ ինչո՞ւ յայտարարութիւն կատարելուց առաջ յաւելեալ ինֆորմացիա չեմ ստացել: Սակայն, իրականութիւնն այն է, որ յայտարարութիւնից առաջ, ես կապւել եմ բոլոր համապատասխան պատասխանատուների հետ, եւ նրանք հաշւի առնելով առկայ ինֆորմացիան, վստահեցրել են, որ հրթիռով խոցւելու մասին խօսք լինել չի կարող»,- ասել է Ռաբիին:

Նա բարձր է գնահատել դէպքի վերաբերեալ ԶՈՒ-ի գլխաւոր շտաբի յայտարարութիւնը՝ նշելով, որ այն վկայում է մարդկային մօտեցման, քաջութեան, եւ պատասխանատւութեան զգացմունքի մասին, եւ վստահեցրել է, որ թափանցիկութիւնը պահպանւելու է մինչեւ վերջ:

Ռաբիին, սակայն, խոստովանել է, որ ժամանակին տեղեկատւութիւն չներկայացնելու պատճառով, անդառնալի վնաս է հասցւել հանրային-հասարակական կապիտալին:

Կառավարութեան խօսնակը կարեւորել է դէպքի հետ կապւած բոլոր բացթողումների եւ սխալների համապարփակ ուսումնասիրութիւնը՝ նման ողբերգական դէպքերի կրկնութիւնը բացառելու համար:

Յարակից լուրեր

Ամենաշատ ընթերցւած

Քւէարկութիւն

Կը յաջողւի՞ արդեօք Արմէն Սարգսեանին նոր որակ մտցնել ՀՀ քաղաքական կեանքում:

Եղանակ

Հեղինակություն © 2011-2017 «ԱԼԻՔ» Օրաթերթ։ Բոլոր իրավունքները պահպանված են։