Արման Թաթոյեան. «Հայկական համայնքները անհրաժեշտ է բարձրաձայնեն, որ կեղծիք է հայերին իսլամաֆոբ ներկայացնելու Ադրբեջանի մեղադրանքները»

«ԱԼԻՔ»- Անհրաժեշտ է յստակ հասկանալ, որ Ադրբեջանի քաղաքականութիւնը ուղղակի Ցեղասպանական քաղաքականութիւն է, որը հիմնւած է էթնիկ եւ կրօնական պատկանելիութեան հիմքի վրայ: Ադրբեջանը Հայաստանի նկատմամբ ունի յստակ ծրագրեր, հետեւաբար պարտադրում, ամէն ինչ կատարում է, որպէսզի իրականացնի իր ծրագրերը Արցախը հայաթափել: Այս մասին «ԱԼԻՔ»-ի հետ զրոյցում յայտնեց ՀՀ մարդու իրաւունքների նախկին պաշտպան Արման Թաթոյեանը:

Արման Թաթոյեանը արձանագրեց, որ Լաչինի միջանցքում ստեղծւած ճգնաժամի էութիւնը միայն չի սահմանափակւում հումանիտար խնդիրներով, նաեւ Հայաստանի միջեւ հաղորդակցութեան հարցն է ճգնաժամի կարեւորագոյն բաղադրիչներից մէկը: Հետեւաբար, այն կեանքի իրաւունքի, արժանապատւութեան, անվտանգութեան հարց է:

Անդրադառնալով Ադրբեջանի նախագահի վերջերս հնչեցրած յայտարարութիւններին, մուսուլմանական աշխարհին մի քանի անգամ կոչով դիմելու եւ հայերից ու Հայաստանից վրէժխնդիր լինելու հետ կապւած, Արման Թաթոյեանը նշեց, որ բացարձակ կեղծիքներով մեր ժողովրդին մեղադրում են իսլամաֆոբիայի մէջ:

«Այդ կոչերը, ըստ էութեան, ադրբեջանական ագրեսիւ յարձակումն է ողջ քրիստոնէական համայնքի ուղղութեամբ: Սա անմիջականօրէն ուղղւած է էթնիկ հայկական ինքնութեան վերացմանը: Հետեւաբար աշխարհասփիւռ հայկական համայնքները, մասնաւորապէս իսլամ դաւանող երկրներում մեր հայրենակիցները հարկաւոր է կարեւոր դերակատարութիւն դրսեւորեն»,- նշեց նա:

Հարցմանը թէ ինչ քայլեր է հնարաւոր կատարել, որպէսզի մուսուլմանական երկրներին ուղերձ յղենք, խնդրի էութեան մասին՝ քողարկելով, Ադրբեջանի նպատակները եւ իրականութիւնը խեղաթիւրելու այդ երկրի փորձերը, Թաթոյեանը արձանագրեց, որ այստեղ մասնաւորապէս իրանահայութիւնը անհրաժեշտ է միջոցներ կիրառեն:

«Իրականում, անհրաժեշտ է ամենուրեք Իրանի իշխանութիւնների ներկայացուցիչներին, տարբեր գիտական, մտաւորական շրջանակներին յիշեցնել, որ հայերը դարերով ապրել են իսլամ դաւանող երկրներում, Իրան, Սիրիա, Արաբական տարբեր երկրներ եւ աշխարհի բազմաթիւ ժողովուրդների հետ մենք ապրել ենք որպէս բարեկամներ եւ հայերին կրօնական բաղադրիչի հիմքի վրայ ոչնչացնելու կոչերը, արհեստական թշնամանք բորբոքելու գործողութիւններ են»,- նշեց նա:

Իրանահայութիւնը մեր հիմնարար կարեւորագոյն համայնքներից է, որը մեծագոյն դերակատարութիւն ունի, ուստի, ունենալով անհրաժեշտ բոլոր փաստերը, իր հնարաւորութիւններով անհրաժեշտ է տեղեկացնի, որ Ադրբեջանի քայլերը արհեստական են, որպէսզի Իրանը մոլորութեան մէջ չլինի:

«Անհրաժեշտ է արձանագրել, որ հայերը չեն հակադրում իսլամին, այլ յարգում են իսլամին: Մենք յարգանքով ենք վերաբերում այլ կրօններին, անհրաժեշտ է այդ փաստերը անընդհատ բարձրաձայնել, որ հայերը չունեն թշնամանք որեւէ կրօնի նկատմամբ եւ կեղծիք է հայերին, որպէս իսլամաֆոբ ներկայացնելու Ադրբեջանի մեղադրանքները»,- շեշտեց նա:

Արման Թաթոյեանը յաւելեց, որ հարկաւոր է համախմբել միջազգային կառոյցներին, որպէսզի Ադրբեջանը կարծրատիպեր չտարածի, ասելով նաեւ, որ Հայաստանը «Արեւմտեան Ադրբեջան է»:

ՍԻՒՆԷ ՖԱՐՄԱՆԵԱՆ