ԻԻՀ-ում ՀՀ դեսպանութեան խորհրդականի հանդիպումը՝ Ատրպատականի հայոց թեմի առաջնորդի հետ
Ատրպատական, ազգային առաջնորդարան, Թաւրիզ – Չորեքշաբթի, յունւարի 24-ին, առաւօտեան, Թաւրիզ ժամանելուց մէկ ժամ յետոյ, ԻԻՀ-ում ՀՀ դեսպանութեան խորհրդական Գրիգոր Մելքոնեանը այցելեց Ատրպատականի հայոց թեմի ազգային առաջնորդարան, իր պաշտօնական անդրանիկ հանդիպումը ունենալու թեմակալ առաջնորդ Տ. Գրիգոր արք. Չիֆթճեանի հետ: Յարգելի հիւրին ընկերակցում էր ՀՀ Թեհրանի դեսպանատան դիւանագիտական կազմից՝ Արամ Մանուկեանը: Հակառակ տեղացող առատ ձեան, նրանց յաջողւել էր ցամաքի ճանապարհով խաղաղութեամբ հասնել Թաւրիզ:
Սրբազան Հայրը իր գրասենեակում ընդունեց հայրենի դիւանագէտներին, իր կողքին ունենալով Թեմական խորհրդի ատենապետ՝ Գագիկ Ջորջեանին: Թաւրիզ ժամանելուց յետոյ թեմի հոգեւոր ու ազգային կենտրոնատեղին այցելելով, ԻԻՀ-ում ՀՀ դեսպանութեան խորհրդական Գրիգոր Մելքոնեանը Սրբազան Հօրը տեղեկացրեց առաջիկայ իր ծրագրերի մասին, որոնք Թաւրիզում Հայաստանի Հանրապետութեան հիւպատոսութեան հիմնումին յաջորդող քայլերն էին լինելու:
Շուրջ երկու ժամ տեւած հանդիպման ընթացքում, կողմերը քննարկեցին գործնական մի շարք քայլեր, հայ-իրանական յարաբերութիւնները բոլոր մակարդակների վրայ արդիւնաւէտ դարձնելու գծով: Գրիգոր Մելքոնեանը շնորհակալութիւն յայտնեց Ատրպատականի հայոց թեմին, ի մասնաւոր Սրբազան Հօրը, որոնք անցնող տարիներին, գրեթէ հիւպատոսութեան դերակատարութիւն էին ստանձնել Թաւրիզում, ՀՀ քաղաքացիների սահմանային եւ այլ մարդասիրական հարցերին իրենց օժանդակութիւնը բերելով, հովանաւորութեամբ Փոքրամասնութիւնների գրասենեակին:
Սրբազան Հայրը այս առիթով հայրենի դիւանագէտներին յայտնեց այն կարելիութիւնները, որոնց սահմաններում Ատրպատականի հայոց թեմը կը կարողանայ իր օժանդակութիւնը բերել հիւպատոսութեան աշխատանքներին: Ատենապետ Գագիկ Ջորջեանը եւս Թեմական խորհրդի պատրաստակամութիւնը յայտնեց, կարելի բոլոր միջոցներով օժանդակել հիւպատոսութեան, Թաւրիզում կազմակերպչական նախնական քայլերը վերցնելու ընթացքին:
Սրբազան Հայրը կէսօրւան, ճաշով պատւեց հիւրերին, մասնակցութեամբ՝ Թեմական խորհրդի ատենապետին, որի ընթացքում շարունակւեց մտերմիկ զրոյցը: Այս առիթով կարեւորութեամբ շեշտւեց, որ պատմութեան ընթացքում առաջին անգամը լինելով ՀՀ հիւպատոսութիւն է հաստատւում Թաւրիզում, որը յատկապէս հայ-իրանական ներկայ բարիդրացիական եւ եղբայրական յարաբերութեան մթնոլորտն է զօրացնելու, եւ ամէն իմաստով՝ յատկանշական է լինելու:
