Արցախի Հանրապետութեան նախագահի պաշտօնակատար Դաւիթ Իշխանեանի կոչը Արցախի ժողովրդին
Ոչ ոք իրաւունք չունի մեր հանրութեանը տանել արկածախնդրութեան մեզ համար ճակատագրական այս ժամանակահատւածում
Յարգելի՛ հայրենակիցներ,
Սեպտեմբերի 9-ին, Արցախի Հանրապետութեան Սահմանադրութեան համաձայն՝ Ազգային ժողովն ընտրելու է Հանրապետութեան նախագահ: Ստեղծւած ոչ սովորական իրավիճակում այս քայլին ենք գնում ամէն օր աւելացող մարտահրաւէրներին արագ արձագանգելու, երկրի ներքին կեանքն արդիւնաւէտօրէն կազմակերպելու եւ արտաքին մարտահրաւէրներին յաւուր պատշաճի դիմագրաւելու նպատակով:
Երկրի ղեկավար ընտրելու իրաւունքն ու պարտականութիւնը Սահմանադրութեամբ դրւած է ձեր կողմից ընտրւած խորհրդարանի վրայ: Բացառապէս Արցախի Ազգային ժողովի խմբակցութիւններին է վերապահւած հանրապետութեան նախագահի թեկնածու առաջադրելու լիազօրութիւնը, ինչն էլ իրականացւել է սահմանւած կարգով: Առ այսօր Հանրապետութեան նախագահի հրաժարականի եւ նոր նախագահի ընտրութեան համար նախապատրաստական բոլոր գործընթացները կազմակերպւել են Սահմանադրութեանն ու օրէնսդրութեանը համապատասխան՝ հաշւի առնելով առկայ սուր ճգնաժամային իրավիճակը:
Նկատի ունենալով վերջին օրերին հանրային տրամադրութիւններում զարգացող որոշակի վտանգաւոր միտումները՝ այս պատասխանատու պահին, ինձ վերապահւած իրաւունքով, սթափութեան կոչ եմ անում բոլորին ու յորդորում չտրւել ժողովրդին պառակտող սադրանքներին, չենթարկւել նեղ խմբական շահերին եւ յանուն ընդհանուր շահի մի կողմ թողնել անձնական նախապատւութիւնները: Ոչ ոք իրաւունք չունի մեր հանրութեանը, նրա առանձին խմբերի տանել արկածախնդրութեան մեզ համար ճակատագրական այս ժամանակահատւածում: Ուզում եմ յատուկ ընդգծել եւ վստահեցնել ձեզ, որ ներքին կայունութիւնը խաթարող բոլոր գործողութիւնները կը կասեցւեն օրէնքի ուժով:
Մենք ունենք բոլոր հնարաւորութիւնները՝ ի չիք դարձնելու Արցախի Հանրապետութեան պետական ինստիտուտները կազմալուծելու Ադրբեջանի ցանկութիւնը եւ որեւէ գործողութեամբ չպէտք է նպաստենք ադրբեջանական յանցաւոր նպատակների իրագործմանը:
Մենք յանձնառու ենք պաշտպանելու եւ ամրապնդելու երեք տասնամեակ կերտած պետականութեան հիմքերը: Դա մեր ժողովրդի ցանկութիւնն է, կամքը, եւ մենք պարտաւոր ենք առաջնորդւել այդ պատգամներով:
Յաջողութիւն եմ մաղթում բոլորիս՝ այս յոյժ կարեւոր քաղաքական գործընթացն իրականացնելու ճանապարհին:
Հաւատացած եղէ՛ք՝ միասին անհնարը հնարաւոր կը դարձնենք:
