«Փաշինեանենք մի քիչ էլ բանակցեն, Ադրբեջանին էլ բանակ պէտք չի լինի»

ՀՅԴ Հայաստանի ԳՄ Հանրային կապերի գարսենեակի պատասխանատու, ՀՀ ԱԺ «Հայաստան» խմբակցութեան պատգամաւոր Քրիստինէ Վարդանեանը արձագանգել է Միլլի մեջլիսի յայտարարութեանը.

«Փաշինեանենք մի քիչ էլ բանակցեն, Ադրբեջանին էլ բանակ պէտք չի լինի:

Դեկտեմբերի 26-ին Ադրբեջանի Միլլի մեջլիսը «Արեւմտեան ադրբեջանցիների՝ իրենց պատմական հայրենիք վերադառնալու» մասին յայտարարութիւն է ընդունել: Սրանից աւելի ուղիղ հնարաւոր չէ արտայայտել պետական քաղաքականութեան նպատակադրումները:

Ու պատկերացրէք` մեր կողմից ովքեր պէտք է «դիմագրաւեն» այս օրակարգին:

Ինչ ուզող այն էլ բանակցող, ցանկացած բարենպաստ առաջարկից «բա իմ մասին ինչ կասեն» հիմնաւորմամբ հրաժարւող, վերջում կապիտուլիացիա ստորագրող Փաշինեանը, բացառապէս դաշնամուր նւագելու եւ դագաղի նկարւելու հետ ասոցացւող Վահագն Խաչատուրեանը, հայկական դիւանագիտութեան «դափնեպսակ» Արարատ Միրզոյեանը եւ ՔՊ մնացած «պրոֆեսիոնալների» թիմը:

Մենք մի բան միայն պէտք է գիտակցենք. Ադրբեջանն իր իւրաքանչիւր գործողութեամբ միայն ապացուցում է, որ խնդիրը երբեք չի եղել Արցախը:

Այսքանից յետոյ գոնէ մի քիչ յարգանք դրսեւորէին իրենց այդքան ծառայութիւն մատուցած գործընկերոջ` Փաշինեանի նկատմամբ ու այսքան ակնյայտ ու հասկանալի ցոյց չտային «խաղաղութեան դարաշրջան» կոչւած կոնցեպտի ողջ կեղծութիւնը»:

Յիշեցնենք, որ երէկ դեկտեմբերի 26-ին, Ադրբեջանի Միլլի մեջլիսը յայտարարութիւն է ընդունել «արեւմտեան ադրբեջանցիների»՝ իրենց «պատմական հայրենիք» վերադառնալու վերաբերեալ: Այս մասին յայտնում են տեղի լրատւամիջոցները:

Յայտարարութեան մէջ ընդգծւում է, որ վստահութեան ամրապնդման միջոցներից է «արեւմտեան ադրբեջանցիների» վերադարձի ապահովումը իրենց «պատմական հողեր»։

Յայտարարութեան մէջ նշւում է, որ «ադրբեջանցիները դարեր շարունակ ապրել են ներկայիս Հայաստանի Հանրապետութեան տարածքում» եւ որ այնտեղ ապրող «բնակչութեան մեծամասնութիւնը ադրբեջանցիներ էին»։

«Համայնքի ներկայացուցիչները կարծում են, որ ներկայիս Հայաստանի տարածքում «արեւմտեան ադրբեջանցիների»՝ «իրենց նախնիների հայրենիք» վերադառնալու իրաւունքի ճանաչումն Ադրբեջանի եւ Հայաստանի միջեւ վստահութեան ձեւաւորման կարեւորագոյն գործիքներից է։ Սա կարեւոր քայլ կը լինի երկու պետութիւնների միջեւ իրական խաղաղութեան հասնելու եւ տարածաշրջանում համակեցութեան միջավայր ստեղծելու ուղղութեամբ»,- ասւած է յայտարարութեան մէջ։

Yerkir.am