Թեհրանի քաղաքապետարանի 3-րդ շրջանի քաղաքապետ Ջաւանին եւ նոյն քաղաքապետարանի այլ պաշտօնակատարներ այցելեցին «Արարատ» մարզաւան
Չորեքշաբթի, 24 յունւարի 2024 թ.-ի առաւօտեան Հ.Մ.Ա.Կ.-ի Կենտրոնական վարչութեան հրաւէրով «Արարատ» մարզաւանում հիւրընկալւեց Թեհրանի քաղաքապետարանի 3-րդ շրջանի քաղաքապետ Ջաւանին եւ նոյն քաղաքապետարանի այլ պաշտօնակատարներ, որոնց դիմաւորեց Կենտրոնական վարչութեան նախագահ՝ Սոֆի Ջաղարբէգեանը եւ Կենտրոնական վարչութեան անդամներ՝ Արմանդ Դրորը, Ժորժ Աղայեանը եւ Դարւին Աւագեանը։
Հանդիպման ընթացքում քննարկւեց եւ Կենտրոնական վարչութեան կողմից փոխանցւեց երախտիքի խօսքեր «Արարատ» մարզաւանում կատարւած մի շարք վերանորոգումների եւ շինարարութիւնների կապակցութեամբ։
Եղան երկուստեք խորհրդակցութիւններ եւ առաջադրանքներ ի մասնաւորի շեշտադրւեց կառուցւած ջրամբարի եւ վերանորոգւած հանդերձարանների պարագան։
Այցի արդիւնքում Ջաւանին ցուցաբերել է դրական ու բարեացակամ մօտեցում մարզաւանի տարածքի պահպանման ու մի շարք նորոգութիւններ կատարելու ուղղութեամբ քաղաքապետարանի հնարաւորութիւններից օգտւելու առումով։
Հիւրընկալութեան աւարտին յարգարժան հիւրին յանձնւել է յուշանւէր։
Հ. Մ. «ԱՐԱՐԱՏ» Կ.
