Իրանն ու Հայաստանը պայմանաւորւել են աւարտին հասցնել «Հիւսիս-Հարաւ» անցման միջանցքները
«ԱԼԻՔ» – Իրանի Իսլամական Հանրապետութեան ճանապարհների եւ քաղաքաշինութեան նախարարը յայտնել է 2024 թւականի սկզբից ռուսների մասնակցութեամբ Ռաշթ-Աստարա երկաթուղային գծի շինարարութեան մեկնարկի, ինչպէս նաեւ Հայաստանի հետ «Հիւսիս-Հարաւ» անցման միջանցքը աւարտին հասցնելու վերաբերեալ պայմանաւորւածութեան մասին։
Parstoday-ի համաձայն՝ Մեհրդադ Բազրփաշն ասել է, որ Հայաստանի հետ համաձայնութիւնը յանգեցրեց նրան, որ առաջին անգամ իրանական ընկերութիւնների հետ կնքւեց աւելի քան 20 միլիոն դոլար արժողութեամբ պայմանագիր՝ «Հիւսիս-Հարաւ» անցման միջանցքն աւարտին հասցնելու համար։
Իրանի Իսլամական Հանրապետութեան ճանապարհների եւ քաղաքաշինութեան նախարարը, ընդգծելով, որ տրանսպորտի ոլորտում «Իրան Ռահ մեգա» նախագիծը օրակարգ է մտցւել, ասել է. «Որպէսզի իմանանք, թէ ինչպիսին է մեր վիճակը միջազգային եւ տարածաշրջանային միջանցքներում, պէտք է ուսումնասիրենք տարանցումը, տարանցման եկամտաբերութեան ներուժն ու թողունակութիւնը եւ վերջին մէկ տարում դրա աճը, եւ հասկանանք, թէ վերջին տարում հարեւանութեան քաղաքականութիւնը եւ ձեռք բերւած պայմանաւորւածութիւնները որքանո՞վ են աւելացրել տարանցման մեր մասնաբաժինը, ո՞ր տարանցիկ առանցքն է մեզ համար սպառնալիք, եւ որը՝ հնարաւորութիւն»։
