Հինգշաբթի՝ ապրիլի 25-ին, Սպորտի եւ երիտասարդութեան նախարարի խորհրդարանական հարցերով տեղակալ Սէյէդ Մաջիդ Սէյէդ Մոմենին այցելեց Նոր Ջուղայի Հայ Մ. Մ. «Արարատ» միութիւն, ուր տեղի ունեցաւ հանդիպում: Հանդիպմանը ներկայ էին՝ Իրանի Իսլամական խորհրդարանում Սպահանի եւ հարաւային իրանահայութեան պատգամաւոր Ռոբերտ Բեգլարեանը, Թեմական խորհրդի անդամներ՝ ատենապետ Վարուժ Մինասեանն ու Նարբէ Ջարդն Դաւուդը, «Արարատ» միութեան արտօնատէր Թաթուլ Օհանեանը, Կենտ. վարչութեան անդամներն ու ներքին վարիչը, միութեան միաւորների, ֆուտբոլի յանձնախմբի ու Շահինշահրի մասնաճիւղի ներկայացուցիչները եւ համայնքիս անւանի նախկին ու ներկայ մարզիկներ եւ մարզիչներ՝ Վահիկ Թորոսեանը, Արէն Դաւուդին, Գամեր Դիլանչեանը, Անայիս Խուդավերդեանն ու Նարէ Ղարախանեանը:
Հանդիպումն սկիզբ առաւ Ռոբերտ Բեգլարեանի ողջոյնի եւ բարիգալստեան խօսքերով: Նա շնորհակալական խօսք ասաց Սպորտի եւ երիտասարդութեան նախարարութեանը՝ ի մասնաւորի նախարար դոկտ. Հաշեմիին եւ պրն. Սէյէդ Մոմենիին՝ Հայաստանում կայացած վերջին Համահայկական խաղերին իրանահայ մարզական պատւիրակութիւնների մասնակցութեան ֆինանսական հարցերի կարգաւորման ուղղութեամբ ամենասեղմ ժամկէտում կատարած օժանդակութեան համար: Պրն. Բեգլարեանն ընդգծելով, որ «Արարատ» միութիւնը համայնքի կենսունակութեան կարեւարագոյն կենտրոններից է, բարձր գնահատեց այս վայրի դերակատարութիւնը մշակոյթի ու սպորտի զարգացման եւ հասարակութեան անդամների շփման ու յարաբերւելու գործում:
Այնուհետեւ «Արարատ» միութեան Կենտ. վարչութեան անդամուհի Մանիա Ղուկասեանը, ներկայացնելով հանդիպմանը ներկայ միութեան պատւիրակութեան անդամներին, ինչպէս նաեւ անւանի մարզիկներին ու մարզիչներին, յատկապէս բացատրութեամբ հանդէս եկաւ «Արարատ»-ի մարզական աշխատանքների կապակցութեամբ:
Շարունակութեան մէջ ներկաներին առիթ ընձեռւեց արտայայտւելու, ուր հնչեցին բարի գալստեան եւ շնորհակալական խօսքեր ու փոխանակւեցին աշխատանքների մասին մի շարք տեղեկութիւններ, իսկ միութեան պատմական անցեալի եւ ներկայ գործունէութեան շուրջ յաւելեալ տեղեկութիւններ փոխանցեց Թաթուլ Օհանեանը, յոյս յայտնելով, որ «Արարատ»-ի ընտանիքի անդամները կարողացել եւ կարողանալու են որպէս Իրանի քաղաքացիներ իրենց աշխոյժ դերակատարութիւնն ունենալ երկրի սպորտի զարգացման գործում:
Վարուժ Մինասեանը նշելով, որ Թեմական խոհուրդը միշտ հովանաւորել եւ հովանաւորելու է «Արարատ» միութեանը եւ սատար է հանդիսանալու այս վայրում իրականացւող շինարարական աշխատանքներին, շնորհակալութիւն յայտնեց միութեանը կատարւած բոլոր պետական աջակցութիւնների համար:
Սէյէդ Մոմենին ներկաներին փոխանցելով Սպորտի եւ երիտասարդութեան նախարար դոկտ. Հաշեմիի ջերմ ողջոյնները՝ մեծ նշանակութիւն տւեց իրանահայ պատւիրակութեան մասնակցութեանը Հայաստանի Համահայկական խաղերին եւ խոստացաւ ամէն ճիգ գործադրել, որպէսզի հարկ եղած օժանդակութիւնը ցուցաբերւի միութեան մարզական խմբերի գործուղումների եւ մրցոյթների հետ կապւած խոչընդոտների վերացման ուղղութեամբ:
Հարկ է նշել, որ Սէյէդ Մոմենին նաեւ շրջելով «Արարատ» միութեան տարբեր բաժիններով ծանօթացաւ միութեան աշխատանքներին եւ մարզական հնարաւորութիւններին: Վերջում նախարարի տեղակալին նւիրւեց յուշանւէր, իսկ հանդիպումն աւարտւեց ճաշկերոյթով եւ խմբական լուսանկարմամբ:
Թղթակից (Նոր Ջուղա)
