ՌԴ ԱԳՆ. «Արեւմուտքի դիրքորոշման պատճառով ՄԱԿ-ի ԱԽ-ն չկարողացաւ համարժէք արձագանգել Իրանի հիւպատոսութեան վրայ յարձակմանը»
«ԱԼԻՔ» – Ռուսաստանի ԱԳ նախարարութիւնը յայտարարութիւն է տարածել նախօրէին Իսրայէլի վրայ Իրանի յարձակման կապակցութեամբ: Հաղորդում է «ՌԻԱ Նովոստի»-ն:
Յայտարարութեան մէջ մասնաւորապէս ասւած է. «Ապրիլի 14-ի գիշերը մեծ քանակութեամբ հրթիռներ եւ անօդաչու սարքեր են արձակւել Իսրայէլի ուղղութեամբ։ Իրանի ԱԳՆ-ի հաղորդմամբ՝ այս յարձակումն իրականացւել է ՄԱԿ-ի կանոնադրութեան 51-րդ յօդւածի համաձայն ինքնապաշտպանութեան իրաւունքի շրջանակում՝ ի պատասխան տարածաշրջանում իրանական օբիեկտների վրայ, այդ թւում՝ ապրիլի 1-ին Դամասկոսում Իրանի դեսպանատան հիւպատոսական բաժանմունքի վրայ յարձակմանը, ինչը մեր երկիրը խստօրէն դատապարտել է:
Ցաւօք, արեւմտեան անդամների դիրքորոշման պատճառով ՄԱԿ-ի Անվտանգութեան խորհուրդը չկարողացաւ համարժէք արձագանգել Իրանի հիւպատոսական ներկայացուցչութեան վրայ յարձակմանը։
Մենք մեր խորին մտահոգութիւնն ենք յայտնում տարածաշրջանում հերթական վտանգաւոր էսկալացիայի կապակցութեամբ։ Բազմիցս զգուշացրել ենք, որ Մերձաւոր Արեւելքում, առաջին հերթին, պաղեստինա-իսրայէլական հակամարտութեան գօտում բազմաթիւ ճգնաժամերի չլուծւած լինելը, որոնք յաճախ սնուցւում են անպատասխանատու սադրիչ գործողութիւններով, կը հանգեցնեն լարւածութեան աճի:
Բոլոր ներգրաււած կողմերին կոչ ենք անում զսպւածութիւն ցուցաբերել։ Յուսով ենք, որ տարածաշրջանի երկրները կը լուծեն առկայ խնդիրները քաղաքական եւ դիւանագիտական ճանապարհով։ Մենք կարծում ենք, որ կարեւոր է, որ կառուցողական տրամադրւած միջազգային խաղացողները նպաստեն դրան»:
